जनताको आपतलाई व्यापारमा बदल्ने नर्भिक अस्पतालका अनेकौँ फण्डा
जगन्नाथ ढकाल- आषाढ ०४, २०७८ २१:२९ मा प्रकाशित
अ +
अ -
काठमाडाैं । केहीदिन यता देशभर बाढी, पहिरोले जन-धनकाे ठूलो क्षति पुर्याइरहेको छ । सबैभन्दा धेरै क्षति सिन्धुपाल्चोकको हेलम्बु र मेलम्ची क्षेत्रमा भयो । त्यहाँको अवस्था निकै दर्दनाक देखिएको छ । बाढी, पहिरो पीडिलाई सहयोग र राहतका लागि व्यक्ति संघ, संस्था सरकारी निकाय जुटिरहेका छन् ।
राजधानी नजिकैको जिल्लामा बाढीले मच्चाएको यो वितण्डा देखेर राजधानीको एक अस्पतालले भने नयाँ योजना अघि सारेको छ । त्यो हो काठमाडौंको थापाथलीस्थित नर्भिक अस्पताल ।
के ल्यायो त योजना ?
नर्भिकले ल्याएको योजना पक्कै बाढी पीडितलाई राहत वा सहयोग त होला भन्ने लाग्न सक्छ ! तर भ्रममा नपर्नुहोस् । सिन्धुपाल्चोकको यो दुर्दशा देखेर नर्भिक अस्तपाले ठहर गरेको छ, अब यस्ता घटना देशभर घट्नेछन् । यसी निचोडका साथ उसले अस्पतालमा बिरामी तान्ने अर्काे फण्डाको रचना गरेको छ । 'बाढीपहिरो पीडितका लागि नर्भिकमा अलग्गै उपचार युनिट' यसको प्रचार गर्नका लागि बनिबनाउ समाचार प्रकाशनका लागि सञ्चार माध्यममा पठाएको छ ।
फेरि यसमा भ्रम नहोस् बाढी, पहिरोमा परी घाइते भएकालाई निशुल्क वा सहुलियतमा उपचार गर्न लागेको हो की ? अँह यहाँ यो अफरमा सहुलियत वा छुटको कुरा कतै गरिएको छैन। बाढी, पहिरो पीडितहरुको सहज, सरल र प्राथमिकताका साथ उपचार होस् भनेर अलग्गै युनिट सञ्चालनमा ल्याइएको दावी गरिएको छ । बरु त्यस युनिटमा हुने सेवा, सुविधाको बखान गरिएको छ ।
त्यो युनिटमा डेडिकेटेड शैय्या, चिकित्सक तथा स्टाफ नर्सको छुट्टै टिम लगायत उच्च स्तरको सेवा, सुविधा हुने भन्दै अफर गरिएको छ । झट्ट हेर्दा देशको विपत्तिमा सहयोग गर्न तत्परता देखाएको जस्तो भ्रम उसले छर्न खोजेको देखन्छि । तर खासमा नर्भिकले आफ्नो व्यापार बढाउन नयाँ अफर ल्याएको बाहेक केही देखिँदैन । अचम्म त के भने मिडियाको इमेलमा यो समाचार पठाउँदा ‘अर्जेन्ट न्यूज भनेर लेखिएको थियो ।
नेताको उपचारमा उस्तै फण्डा
पोस्ट कोभिडको समस्या देखिएर नर्भिक अस्पताल भर्ना हुनुभएका पूर्वप्रधानमन्त्री तथा एमाले नेता झलनाथ खनाललाई थप उपचारका लागि दिल्ली लगिएको छ । उनी अस्पताल भर्ना भएको र उपचारका लागि दिल्ली गएको विषयलाई पनि नर्भिकले अस्पतालको विज्ञापन गर्ने अवसरका रुपमा मज्जैले प्रयोग गरेको छ ।
खनालको स्वास्थ्य अवस्थाबारेको जानकारी अस्पतालले मिडियालाई पठाइरहेको थियो। त्यसरी पठाउँमा अस्पतालमा रहेका खनालको फोटो खिचेर त्यसमा अस्पतालको बढेमानको लोगो लगाएर पइएको थियो । जुन फोटो सञ्चार माध्यममा प्रकाशन गर्न मिल्ने खालको थिएन , अस्पतालको असुहाउँदो लोगोकै कारण ।
बिरामी भएका नेताको फोटो मिडियालाई दिँदा समेत अस्पतालले विज्ञापन गर्ने अवसर छोप्नतिर लागेको देखियो । अस्पतालले यसो गर्न पाउँछ ? भनी स्वास्थ्य मन्त्रालयका एक अधिकारीलाई प्रश्न गर्दा उहाँले अनविज्ञता प्रकट गर्नुभयो।
‘अस्पतालले आफूलाई देशका भीआइपीको उपचार गर्ने अस्पताल भएको देखाउन खोजेको होला’ ती अधिकारीले भन्नुहुन्छ । आफ्नो अस्पतालमा आएमा मात्रै राम्रो उपचार हुन्छ भन्ने खालको सन्देश दिन खोजेको पनि हुनेसक्ने उहाँको भनाइ छ ।
नेपालमा भर्खर कोरोना संक्रमण सुरु हुँदा नर्भिकमा गरिएको आरडीटी परीक्षणमा एक जनाको पोजेटिभ रिपोर्ट आएको थियो । त्यो विषयमा समाचार बनाउँदा समेत नर्भिकले सञ्चार माध्यमलाई त्यो समाचार हटाउन भन्दै धम्की दिएकाे थियो । अस्पतालमा कोरोना भेटिएको हल्ला हुँदा बिरामी नआउने चिन्ता अस्पताललाई थियो । नेपालमा कोरानो संक्रमण बढ्दै गएपछि नर्भिकले कोराना बिरामी राख्ने गरी नयाँ प्याकेज नै ल्याएर विज्ञापन समेत गरेको थियो ।
सरकारले निजी अस्पतालले कोरोना बिरामीको उपचार गर्दा लाग्ने शुल्क तोकेर उपचार गर्न पाउने नियमा जारी गर्यो । पछि कोरोनाका बिरामीलाई निशुल्क उपचार गरेमा सरकारले तोकेको शुल्क सरकारले उपलब्ध गराउने निर्णय पनि गर्यो । त्यसमा नर्भिक मात्रै नभएर कुनै नाम चलेका निजी अस्पताल अग्रसर भएनन् ।
अस्पताललाई कोरोनासँग जोड्नेवित्तिकै व्यापर घट्ने चिन्ताले समाचारसमेत हटाउन लगाउने नर्भिकका लागि पछि कोरोना नै व्यापार बढाउने अवसर बन्यो । अहिले नर्भिकमा कोभिड वार्ड, पोस्ट कोभिड वार्ड जस्ता सेवा सञ्चालनमा छन् ।
नर्भिकले भिआइपी तथा सेलिब्रेटीको उपचार गरेको प्रचार गर्ने गरेको छ । देश र जनतालाई आपत परेको हरेक समयमा कसरी यसलाई व्यापर बढाउनका लागि उपयोग गर्न सकिन्छ भनेर फरक–फरक खालका फण्डा नर्भिकले ल्याउने गरेको छ ।
तपाईँको अभिमत