अमेरिकाको अधिकांश क्षेत्रमा हिउँआँधीको चेतावनी, २० करोडभन्दा बढी मानिस प्रभावित हुन सक्ने

अमेरिकाको धेरैजसो भू–भागमा भीषण हिउँआँधीको चेतावनी जारी गरिएको छ। कुल जनसंख्याको करिब ५५ प्रतिशत अर्थात् झन्डै २० करोड मानिसहरू भारी हिउँ, आँधी र वर्षाको प्रभावमा पर्न सक्ने प्रक्षेपण गरिएको छ।

अमेरिकी राष्ट्रिय मौसम सेवा (NWS)का अनुसार शनिबार बिहानबाट सुरु हुने हिउँआँधी सोमबारसम्म जारी रहने अनुमान गरिएको छ। यस अवधिमा वासिङ्टन डीसी, न्यासभिल, बाल्टिमोर, न्यूयोर्क, टेक्सास र फिलाडेल्फिया लगायतका शहरहरू हिउँले ढाकिनेछन् भने तापक्रम अत्यन्त न्यून रहनेछ।

कोलोराडोदेखि पश्चिम भर्जिनिया हुँदै बोस्टनसम्मका क्षेत्रमा एक फिटभन्दा बढी हिउँ पर्ने सम्भावना रहेको मौसमविद्हरूले जनाएका छन्। प्रतिकूल मौसमका कारण शुक्रबारसम्म अर्कान्सास, जर्जिया, टेक्सास, उत्तरी क्यारोलिना, दक्षिण क्यारोलिना लगायत १६ वटा राज्यमा आपतकालीन अवस्था घोषणा गरिएको छ। सुरक्षाकर्मीहरूलाई उच्च सतर्कताका साथ तयारी अवस्थामा राखिएको छ।

मौसम सेवाले अत्यावश्यक काम बाहेक घरबाहिर ननिस्कन आग्रह गरेको छ। साथै घरपालुवा जनावरहरूलाई पनि घरभित्रै सुरक्षित राख्न अनुरोध गरिएको छ।

उता, फ्लाइट ट्र्याकिङ सेवा फ्लाइट अवेयर का अनुसार प्रतिकूल मौसमको कारण शनिबार र आइतबारका लागि अमेरिका भित्र तथा बाहिरका ८ हजारभन्दा बढी उडानहरू रद्द गरिएका छन्।

हिउँआँधीको पूर्वानुमानपछि अमेरिकाका विभिन्न ग्रोसरी स्टोरहरूमा खाद्यान्न खरिद गर्ने उपभोक्ताको भीडसमेत देखिएको छ।