सम्पादकीय– ६ : प्रधानमन्त्री ओलीको सफल मिर्गौला प्रत्यारोपणले दिएकाे जबरजस्त सन्देश

मिर्गौला प्रत्यारोपणका लागि गरिएको प्रधानमन्त्री केपी शर्मा ओलीको शल्यक्रिया सफल भएको त्रिवि शिक्षण अस्पताल, महाराजगञ्जले एक विज्ञप्ति मार्फत सार्वजनिक जानकारी दिएको    छ । ०७६ फागुन २१ गते बिहान १० बजे शुरु भएको उहाँको शल्यक्रिया करिव ४ घन्टासम्म चलेको थियो । प्रधानमन्त्री ओलीलाई भान्जी समीक्षा संग्रौलाले मिर्गौला दिनुभएको हो । शल्यक्रियाको पूर्वसन्ध्यामा समीक्षाले भन्नुभएको थियो– ‘मैले मामा ओलीलाई मात्र हैन, देशको भविष्य भोलिलाई मिर्गौला दिएकी हुँ ।’ समीक्षाको यो अतुलनीय योगदान र सम्पूर्ण नेपाली दाजुभाइ दिदी बहिनीहरूको कामना सफल भएको छ ।

प्रधानमन्त्री ओलीको मिर्गौला प्रत्यारोपणका लागि गरिएको शल्यचिकित्सा तथा प्रत्यारोपणमा चिकित्सकहरू उत्तमकुमार शर्मा, प्रेम ज्ञवाली, दिव्या शाह, महेश सिग्देल, मुकुन्द काफ्ले, रविन नेपाली, अनिल श्रेष्ठ, सुवास आचार्य र अनन्तकुमार संलग्न हुनुभएको थियो । मिर्गौला प्रत्यारोपणको कार्य सम्पन्न भई उहाँको स्वास्थ्य अवस्था क्रमशः सुधारोन्मुख हुँदै गइरहेको छ । यो हामी सबैका लागि सुखद प्रसङ्ग हो ।

जटिलभन्दा जटिल समस्याको निदानका निम्ति अहिले नेपालकै अस्पताल र नेपाली चिकित्सकहरू सक्षम भइसकेका छन् । तर राजनीतिक नेतृत्व र उच्च पदमा रहेका व्यक्तिहरू सामान्य विरामी हुँदा पनि उपचारको लागि लाखौँको सरकारी बजेट लिएर विदेश उड्ने प्रक्रिया यहाँ परम्परा नै भइसकेको छ । आम नागरिकले सामान्य रोगको उपचार हुन नसकी लावारिस मृत्यु बेहोर्नु परिरहेको अवस्थामा टाठाबाठाहरूद्वारा राजनीतिक पहुँच र सुविधाको दुरुपयोग गरी राष्ट्रिय ढुकुटीबाट करोडौँ अपव्यय गरिरहेको नाङ्गो यथार्थ हाम्रा सामु छँदैछ । यस्तो अवस्थामा प्रधानमन्त्री ओलीले आफ्नो मिर्गौलाको दोस्रो पटकको प्रत्यारोपणका लागि स्वदेशकै अस्पताल र स्वदेशकै चिकित्सकहरू छनौट गरेर जबरजस्त नयाँ सन्देश सम्प्रेषण गर्नुभएको छ ।

जटिलभन्दा जटिल किसिमका रोगहरूको निदानका लागि नेपालमा विद्यमान अस्पताल र चिकित्सकहरू सक्षम छन् । सेवा सुविधामा कमी हुन सक्छ । त्यो कमीपनलाई न्यूनीकरण गर्नेतर्फ सम्बद्ध निकाय अघि सर्नुपर्छ । सिप र दक्षता अभिवृद्धि गर्नेतिर स्रोत र साधन परिचालन गर्नु आवश्यक छ । आफ्नै देशमा उपलब्ध रहेको उपचार प्रविधि र चिकित्सकहरूप्रति विश्वस्त रहनुपर्छ भन्ने सन्देश यो शल्यक्रियाको अर्को महत्वपूर्ण पक्ष हो । प्रधानमन्त्री ओलीले नेपाली चिकित्सकहरूप्रति जुन विश्वास र भरोशा गर्नुभयो, यसले नेपाली चिकित्सकहरू र अस्पतालहरूले गौरवबोध गरिरहेका छन् ।

उपचारका निहुँ र नाममा पहुँच र प्रभाव प्रयोग गर्दै ठूलो धनराशी दुरुपयोग गर्ने परम्परा तोड्नै पर्ने  थियो । औँलामा गन्न सकिने दुईचार जनाको लागि विगतमा विदेशी अस्पतालमा उपचार गराउँदा जति रकम राष्ट्रिय ढुकुटीबाट खर्च गरियो, त्यति खर्चले यहीँ सुविधा सम्पन्न दुई चारवटा अस्पताल नै निर्माण गर्न सकिन्थ्यो । अथवा देशैभरिका प्रमुख स्वास्थ्य केन्द्रहरूलाई स्तरोन्नति गरेर सुविधायुक्त अस्पतालमा परिणत गर्न सकिन्थ्यो । प्रधानमन्त्री ओलीले नेपालमै आफ्नो मिर्गौलाको जटिल भैकन पनि सफल प्रत्यारोपण मार्फत के सन्देश दिनुभएको छ भने अब कुनै नेता तथा उच्चपदस्थ महानुभाव पहुँच र सरकारी सेवा सुविधा दुरुपयोग गर्दै उपचारका नाममा विदेश नजाओस् ।

नेपालको चिकित्सा प्रणालीमाथि अपार विश्वास, भरोशा र आफ्नै पनि उच्च मनोबल प्रस्तुत गरी प्रधानमन्त्री ओली सफल शल्यचिकित्सापछि स्वास्थ्यलाभ गरिरहनुभएको छ । छिटोभन्दा छिटो स्वास्थ्यलाभ गरी उहाँ कार्यक्षेत्रमा फर्किनु होस् । समृद्ध नेपालको आकाङ्क्षालाई यथार्थमा परिणत गर्न उहाँको क्रियाशीलता अबका दिनमा पनि कायम रहोस् । हेल्थपाटी डटकम उहाँको सफल शल्यक्रियामा संलग्न चिकित्सक टोलीप्रति हार्दिक बधाई ज्ञापन गर्दै प्रधानमन्त्री ओलीको शीघ्र स्वास्थ्यलाभको कामना गर्दछ ।