स्वास्थ्यमन्त्रीद्वारा वीर अस्पताल निरीक्षण, १०० आइसियु बेड सञ्चालन गरिदैं
काठमाडौं । स्वास्थ्यमन्त्री शेरबहादुर तामाङले कोभिड - १९ युनिफाइड केन्द्रिय अस्पताल वीरको निरीक्षण गर्नुभएको छ । निरीक्षणका क्रममा उहाँले कोरोना संक्रमित तथा अरु बिरामीको उपचारमा कुनै पनि कसर बाँकी नराख्न अस्पतालका पदाधिकारीहरुलाई निर्देशन दिनुभयो । देशकै पुरानो अस्पताललाई कोभिड अस्पतालका रुपमा परिणत गर्नुको मुख्य लक्ष्य भनेकै बिरामीको सहज उपचार रहेको उहाँले बताउनुभयो ।
मन्त्री तामाङले वीरमा भइरहेको सुधारकाे प्रशंसा गर्दै यही गतिमा काम गरि थप सेवा सुविधामा ध्यान दिन पदाधिकारीहरुलाई निर्देशन दिनुभयो । स्वास्थ्य संस्थाहरुकोस्थलगत निरीक्षण गरि तत्काल समस्या समाधानका लागि पहल गर्ने आफ्नो कार्ययोजनाअनुसार मन्त्री तामाङले आज वीर अस्पतालको निरीक्षण गर्नुभएको हो ।
अस्पतालका प्रमुख प्रशासकिय अधिकारी प्राडा.जागेश्वर गौतमले केही दिनमै वीरमा १०० आइसियु बेड सञ्चालन गर्नेगरि काम भइरहेको जानकारी मन्त्री तामाङलाई गराउनुभयो । वीर अस्पतालमा भइरहेका काम र देखिएका समस्याबारे मन्त्री तामाङलाई ब्रिफिङ गर्दै उहाँले अक्सिजन प्लान्ट जडानको काम भइरहेको र जडान सकिए लगत्तै सर्जिकल भवनको पहिलो र दोस्रो तल्लामा ९३ /९३ एचडीयु बेड सञ्चालन गरिने जानकारी दिनुभयो ।
उक्त अस्पतालमा हाल १८ वटा आइसियु बेड छन् । ९ वटामात्रै आइसियु बेड सञ्चालनमा रहेकोमा अहिले ९ वटा आइसियु बेड थप गरि उपचार थालिएकाे र चाँडै अरु १८ आइसियु बेड थपिने गाैतमले बताउनुभयो ।
सर्जिकल नयाँ भवनमा अहिले २७ जनासहित वीर अस्पतालमा १४० जना कोभिड बिरामीको उपचार भइरहेको छ । पुरानो भवनमा ननकोभिड र नयाँ भवनमा कोभिडको उपचार हुनेगरि वीरमा काम भइरहेको छ ।
तपाईँको अभिमत