प्राडा. गौतम भन्नहुन्छ, ‘कोभिड - १९ यूनिफाइड केन्द्रिय अस्पताल मेरा लागि अवसर र चुनौती’
हेल्थपाटी - जेष्ठ ११, २०७८ १४:०५ मा प्रकाशित
अ +
अ -
काठमाडौं । प्राडा.जागेश्वर गौतमले कोभिड–१९ युनिफाइड केन्द्रीय अस्पताल वीरमा आफ्नो कार्यभार सम्हाल्नुभएको छ । आज दिउँसाे वीर अस्पताल पुगेर उहाँले पदभार सम्हाल्नुभएको हो ।
पदबहाली गर्दै उहाँले यसअघि आर्जेको सिप, ज्ञान र अनुभवलाई विश्लेषण गर्दै काेभिड अस्पतालहरुको सुधारका लागि आफु कटिवद्ध भएर लाग्ने प्रतिवद्धता जनाउनुभयो । यसका लागि योजना बनाएर कार्यान्वयन गर्दै लैजाने उहाँले बताउनुभयो ।
‘म यस अस्पतालमा मेरोे रुचीले मात्रै आएको होइन,अहिले वीरलाई कोभिड - १९ को कमाण्डकाे रुपमा चलाउँदा यसले सक्छ कि सक्दैन भन्ने चुनौतीका साथ सरकारले पठाएको छ । अब यस अस्पतालले देशभरको कोभिडको उपचार गर्ने सम्पूर्ण अस्पतालको कमाण्ड गर्ने भएकाले संक्रमण नियन्त्रणमा अहिलेसम्म कहाँ-कहाँ ग्याप भएको छ, त्यो हेरेर अगाडि बढ्नुपर्ने छ । जनतालाई सहज उपचार दिनपर्नेछ ।यसका लागि मलाई अस्पतालको सबै कर्मचारीको सहयोग आवश्यक छ ।’
उहाँले सुरुमा वीरको अवस्था सुधारमा आफु केन्द्रित रहेको भन्दै यस अस्पतालकाे सुधार आएपछि बाहिरका कोभिड अस्पतालहरुको व्यवस्थापनमा लाग्ने बताउनुभयो ।
नवनियुक्त प्रशासकीय अधिकारी प्राडा. गौतमले आफ्नो लागि यो ठुलो अवसर र चुनौती रहेको भन्दै उहाँले वीरको वेथितिलाई पनि सुधार्दै लैजाने बताउनुभयो ।
जेठ ११ गते हिजोको मन्त्रीस्तरीय निर्णयबाट उहाँलाई युनिफाइड केन्द्रीय अस्पतालको प्रमुख प्रशासकीय अधिकारीमा नियुक्त गरिएको थियो ।
यो अस्पतालको सञ्चालन स्वास्थ्य तथा जनसंख्या मन्त्रालयले गर्नेछ । यस युनिफाइड अस्पतालले देशभर कोरोना संक्रमितको उपचार गर्ने स्वास्थ्य संस्थाहरुको व्यवस्थापन गर्नेछ।
उहाँले २०७७ गत जेठ २५ गतेदखि स्वास्थ्य मन्त्रालयको प्रवक्ताको जिम्मेवारी सम्हाल्नुभएको थियो ।
तपाईँको अभिमत