वीरको नयाँ सर्जिकल भवनमा कोरोनाको उपचार सुरु
काठमाडौं । कोभिड- १९ यूनिफाइड केन्द्रिय अस्पताल वीरको नयाँ सर्जिकल भवनमा कोरोनाको उपचार सुरु भएको छ । प्रमुख प्रशासकीय अधिकारीमा नियुक्त भएको छैठौं दिनमा प्राडा. जागेश्वर गौतमले नयाँ भवनमा कोरोना संक्रमितको उपचार सुरु गर्नुभएको हो ।
अस्पतालका सबै कर्मचारीहरुकाे सहयाेगबाट याे सम्भव भएकाे उहाँले बताउनुभयाे । ५० बेडबाट उपचार सुरु गरिएकाे वीरमा भाेली १०० बेडमा बिरामीकाे उपचार गरिने र यसै हप्ता अस्पतालकाे पूर्ण क्षमतामा उपचार गरिने छ । वीरको नयाँ भवन ५०१ बेड क्षमताको छ ।
ट्रमा र पुरानो भवनमा भने नन कोभिडका बिरामीको उपचार हुने उहाँले जानकारी दिनुभयो । अस्पतालमा ३ सय सिलिण्डर अक्सिजन ल्याइएको छ । एक महिनाभित्र अक्सिजन प्लान्ट जडान गर्ने र लिक्विड अक्सिजन प्रशस्तै हुने उहाँले बताउनुभयो ।
‘सुरुमा वीरमा कोभिड र ननकोभिडको बिरामीको व्यवस्था गर्नेमा मेरो ध्यान केन्द्रित छ । आजदेखि नयाँ भवनमा कोभिडका बिरामीको पनि उपचार सुरु भएको छ । केही दिनमा तपाईहरुले थप काम भएको देख्नु हुनेछ, मलाई सहयोग गर्नुस्,म काममा निकै उत्साहित छु ।’
उहाँले वीरमा काेराेना उपचार सुरु भएसँगै कोरोना उपचारमा सहज हुने दाबी गर्नुभयाे ।
वीरमा उपचार व्यवस्थापनमा सहजीकरण गर्ने उद्धेश्यले प्रमुख २ दिन अगाडि मात्रै २ जनालाई उपनिर्देशकमा नियुक्त गर्नुभएको थियो ।प्रमुख कन्सलटेन्ट चेस्ट फिजिसियन सह प्राडा.अशेष ढुंगाना कोभिडतर्फ र नन् कोभिडतर्फ बरिष्ठ कन्सलटेन्ट एनेस्थेसियोलोजिष्ट डा.नविन पोखरेललाई उपनिर्देशकको जिम्मेवारी दिइएको छ ।
जेठ ११ गतेको मन्त्रीस्तरीय निर्णयबाट गौतमलाई युनिफाइड केन्द्रीय अस्पतालको प्रमुख प्रशासकीय अधिकारीमा नियुक्त गरिएको थियो ।यो अस्पतालको सञ्चालन स्वास्थ्य तथा जनसंख्या मन्त्रालयले गर्नेछ । यस युनिफाइड अस्पतालले देशभर कोरोना संक्रमितको उपचार गर्ने स्वास्थ्य संस्थाहरुको व्यवस्थापन गर्नेछ।
तपाईँको अभिमत