मोटो तिघ्रा हुनेलाई उच्च रक्तचाप कम, पेटको मोटोपन जोखिमपूर्ण

न्यूयोर्क । मोटो तिघ्रा हुने मानिसलाई ब्लड प्रेसरको समस्या कम हुने एक अध्ययनले देखाएको छ । रुटगर्स नर्थ अमेरिकन डिजिज इन्टरभेन्सनले गरेको अध्ययन अनुसार तिघ्राको मोटाइ ठूलो हुने मानिसमा ब्लड प्रेसर कम देखिएको हो ।

उक्त अध्ययन ६० वर्षभन्दा कम उमेरका करिब ६ हजार मानिसमा गरिएको थियो । अध्ययनमा डायस्टोलिक, सिस्टोलिक र कम्बाइन्ड उच्च रक्तचापलाई विभाजन गरिएको थियो । 

त्यसपछि विशेष किसिमको एक्स–रे स्क्यान गरेर माटोपनका तन्तुहरूको मापन गरिएको थियो । सो मापनमा मोटो तिघ्रा नहुनेभन्दा मोटो खुट्टा वा तिघ्रा हुने मानिसमा कम्बाइन्ड उच्च रक्तचाप हुने सम्भावना ६१ प्रतिशतले कम देखियो । त्यस्तै मोटो तिघ्रा हुने मानिसमा डायस्टोलिक र सिस्टोलिक दुबै किसिमका उच्च रक्तचाप कम देखियो ।

यद्यपि कम्मर तथा पेटको मोटोपन स्वास्थ्यका लागि जोखिमपूर्ण हुन्छ । खुट्टा वा तिघ्राको मोटोपनले भने त्यस्तो स्वास्थ्य समस्या ननिम्त्याउने अध्ययनले देखाएको छ । युरोपियन एसोसिएसन फर द स्टडी अफ अबसेटीका अनुसार मृत्युको कारणमध्ये मोटोपन पाँचौँ स्थानमा रहेको छ ।