भूकम्पमा मृत्यु हुनेको संख्या १३८ पुग्यो, काठमाडौंबाट ४१ जना डाक्टर पठाइयो
हेल्थपाटी - कार्तिक १८, २०८० १४:५४ मा प्रकाशित
अ +
अ -
भूकम्प प्रभावित जिल्लाहरुमा काठमाडौंबाट ४१ जना डाक्टरको टीम खटाइएको छ । स्वास्थ्य तथा जनसंख्या मन्त्रालयका प्रवक्ता डा.प्रकाश बुढाथोकीले भूकम्पमा परि घाइतेहरुको सहज उपचारका लागि व्यवस्थापन गरिएको जानकारी दिनुभयो ।
उहाँका अनुसार स्थानीय जिल्लाहरुका प्राथमिक स्वास्थ्य केन्द्र, जाजरकोट, रुकुमका जिल्ला अस्पतालहरु, सुर्खेत, नेपालगञ्ज अस्पतालमा उपचारको व्यवस्था मिलाइएको छ ।
काठमाडौंमा वीर अस्पताल, ट्रमा, पाटन अस्पताल, सिभिल अस्पताल लगायत विशष्ठिकृत अस्पतालहरुलाई तयारी अवस्थामा रहन निर्देशन दिइएको उहाँले बताउनभुयो ।
काठमाडौंबाट सशस्त्र प्रहरी अस्पतालबाट ८, नेपाल प्रहरी अस्पतालबाट ११ र सैनिक अस्पतालबाट १६ र वीर अस्पतालबाट ६ जना गरि ४१ जना डाक्टर परिचालन भइसकेको प्रवक्ता बुढाथोकीले जानकारी दिनुभयो ।
यसैगरी नेपाल चिकित्सक संघले पनि भूकम्प प्रभावित जिल्लामा घाइतेको उपचार गर्न खटिन आफ्ना सदस्यहरुलाई अपील गरेको छ ।
यसैबीच जाजरकोट भूकम्पमा मृत्यु हुनेको संख्या १३८ पुगेको छ । नेपाल प्रहरीले दिउँसो २ वजेसम्म संकलन गरेको तथ्यांक अनुसार जाजरकोटमा १०० जना र रुकुम पश्चिममा ३८ जनाको मृत्यु भएको छ भने १६६ जना घाइते भएका छन् ।
घाइतेमध्ये जाजरकोटमा ८१ र रुकुमपश्चिममा ८५ रहेका छन् । भूकम्प प्रभावित जिल्लाहरुमा ८५९ जना प्रहरी परिचालन गरिएको नेपाल प्रहरीले जनाएको छ ।
तपाईँको अभिमत