मध्यराति पश्चिम नेपालमा ठूलो भूकम्प, उपमेयरसहित ४८ को मृत्यु पुष्टि
हेल्थपाटी - कार्तिक १८, २०८० ०५:०७ मा प्रकाशित
अ +
अ -
मध्यराति पश्चिम नेपालमा ठूलो भूकम्प गएको छ । शुक्रबार राति ११ बजेर ४७ मिनेट जाँदा जागरकोटको रामीडाँडा केन्द्रविन्दु भएर ६.४ म्याग्निच्यूडको भूकम्प गएको राष्ट्रिय भूकम्प मापन तथा अनुसन्धान केन्द्रले जानकारी दिएको छ ।
भूकम्पमा परी जाजरकोट र छिमेकी जिल्ला रुकुम पश्चिममा गरी ४८ जनाको मृत्यु भएको छ ।
जिल्लाका प्रहरी तथा स्थानीय जनप्रतिनिधिहरुले दिएको जानकारी अनुसार दुई जिल्लामा गरी ४८ जनाको मृत्यु भएको पुष्टि भएको छ ।
जिल्लामा २८ जनाको मृत्यु भएको पुष्टि भएको रूकुम पश्चिमका डिएसपी नमराज भट्टराईले जानकारी दिनुभयो ।
जाजरकोटमा नगरपालिका उपप्रमुखसहित २० जनाको मृत्यु भएको पुष्टि भएको छ । नलगाड नगरपालिकाकी उपमेयर सरिता सिंहको भूकम्पमा परी मृत्यु भएको भएको प्रहरीले जानकारी दिएका छन्।
जाजरकोट सदरमुकाम खलंगास्थित घरमा सुतिरहेका बेला भूकम्पले घर भत्किएर सिंहको मृत्यु भएको प्रहरीको भनाइ छ ।
यो भूकम्पको धक्का पश्चिम नेपालसहित काठमाडौ उपत्यका र देशभर महसुस गरिएको थियो ।
उक्त भूकम्प मापन केन्द्रका अनुसार यसपछि मात्रै जाजरकोट शनिबार बिहान १२ः३५ बजेसम्म जाजरकोट केन्द्रविन्दु बनाएर थप ३ वटा भूकम्प गइसकेको छ ।
जसमा १२ः ८ बजे ४.५, १२:२९ बजे ४.२ र १२ः३५ मा ४.३ म्याग्निच्यूडको परकम्प गएको छ ।
घाइतेको संख्या धेरै रहेका र विविरणहरू आउनेक्रम रहेकाले मृत्युको संख्या बढ्न सक्ने स्थानीय जनप्रतिनिधि तथा प्रहरीको भनाइ छ।
तपाईँको अभिमत