अमेरिका नेपाल मेडिकल फाउन्डेसनको निष्कर्ष : समन्वय र सञ्चारमार्फत नेपाली डायस्पोरालाई एकीकृत गर्नुपर्ने
अमेरिका नेपाल मेडिकल फाउन्डेसन
हेल्थपाटी - आषाढ ०६, २०८२ ०६:२५ मा प्रकाशित
अ +
अ -
वासिङ्टन डिसी – अमेरिका नेपाल मेडिकल फाउन्डेसन (एएनएमएफ)को २९ औं वार्षिक साधारणसभा तथा सम्मेलनले डायस्पोरामा रहेका नेपाली डाक्टर, नर्स, स्वास्थ्यकर्मी र विभिन्न पेशामा संलग्न नेपालीहरुलाई समन्वय र सञ्चारमार्फत एकीकृत गर्नुपर्ने निष्कर्ष निकालेको छ ।
जुन १३ देखि १५ सम्म वासिङ्टन डिसीमा भएको सम्मेलनले डायस्पोरामा रहेका स्वास्थ्य पेशाकर्मीबीच सशक्त नेटवर्क बनाउँदै नेपालसँगको सम्बन्धलाई थप मजबुत बनाउने निर्णय गरेको छ ।
नेपाली चिकित्सकको एकता, सीप र अनुभवलाई नेपालको स्वास्थ्य सेवा सुधारमा कसरी प्रभावकारी रुपमा उपयोग गर्न सकिन्छ भन्नेबारे भएको प्यानल छलफलपछि सम्मेलनले यो निष्कर्ष निकालेको हो ।
त्यसैगरी, एएनएमएफले नेपालमा सञ्चालन हुने आफ्ना स्वास्थ्य कार्यक्रमहरु अन्य संस्थासँग दोहोरिन नदिने र आवश्यकता अनुसार सहकार्य गर्दै अगाडि बढ्ने निर्णय पनि गरेको छ।
स्वास्थ्यसँग सम्बन्धित संघसंस्थासँग मिलेर नेपालका विभिन्न क्षेत्रमा प्रभावकारी कार्यक्रम सञ्चालन गर्ने प्रतिबद्धता एएनएमएफले व्यक्त गरेको छ । अध्यक्ष विष्णु सापकोटाले आगामी केही वर्षसम्म विशेष रूपमा बाल स्वास्थ्य हेरचाह र क्यान्सर स्क्रिनिङमा काम गर्ने बताउनुभयो ।
सम्मेलनमा आयोजित एएनएमएप कोष सङ्कलन अभियानमा १ लाख ६० हजार डलरभन्दा बढी रकम सहयोग प्राप्त भएको छ । सहयोग रकम आउने क्रम अझै जारी छ ।
एएनएमएफका सदस्यहरुले नेपालको स्वास्थ्य क्षेत्रमा सुधार ल्याउन उक्त रकम सहयोग गरेका हुन् । संकलित रकम नेपालको स्वास्थ्य सुधारमा लगानी गरिने छ ।
बालस्वास्थ्य सुधार अन्तगर्त काठमाडौं इन्स्टिच्युट अफ चाइल्ड हेल्थमा नवजात शिशुहरूको सघन हेरचाहका लागि नियोनेटल इंटेन्सिभ केयर युनिट परियोजना,धुलिखेल अस्पतालमा निर्माण पोइजन इन्फरमेशन सेन्टर, वीपी कोइराला मेमोरियल क्यान्सर अस्पताल चितवन, नेपाल प्रहरी सिपिआर तालिम, मानसिक स्वास्थ्यमा सहयोग गरिनेछ ।
२९ औ साधारण सभाले पुन : डा.विष्णु सापकोटाको अध्यक्षतामा २५ सदस्यिय कार्यसमिति चयन गरेको छ । सम्मेलनमा अमेरिकाका विभिन्न राज्य, नेपाल र बेलायतबाट ३५० भन्दा बढी नेपाली चिकित्सक तथा आमन्त्रित विज्ञहरूको सहभागिता थियो ।
विगत २९ वर्षको अवधिमा ३ सयभन्दा बढी परियोजनाहरू एएनएमएफले सफलतापूर्वक सम्पन्न गरिसकेको छ । एएनएमएफमा ५४० जना आजीवन सदस्यसहित ६०० सदस्यहरू आवद्ध छन् । अमेरिकामा ३००० नेपाली डाक्टरसहित नर्स तथा स्वास्थ्यकर्मी गरी करिब ५००० हाराहारीमा बसोबास गरिरहेको अनुमान छ ।
सन् १९९७ मा नेपाली डाक्टरहरू र नेपाललाई माया गर्ने अमेरिकी डाक्टर तथा समाजसेवीहरूको समूहले एएनएमएफको स्थापना गरेको थियो ।
तपाईँको अभिमत