बेलायत पठाउन माग भन्दा कम नर्स योग्य, भाषाबारे थप छलफल गरिने (भिडियो)
नेपाली नर्सलाई रोजगारीका लागि बेलायत पठाउन माग गरिएको आवेदनमा मापदण्ड पुगेका नर्सको संख्या माग भन्दा कम भयो ।यो समस्या समाधानका लागि पाइलट प्रोजेक्टपछि भाषा स्कोरबारे नेपालले बेलायत सरकारसँग थप छलफल गर्ने भएको छ ।
पाइलट प्रोगाममा मागभन्दा थोरैको मात्र मापदण्ड पुगेपछि भाषा स्कोरबारे बेलायत सरकारसँग थप छलफल गर्ने तयारी भएको श्रम, रोजगार तथा सामाजिक सुरक्षा मन्त्रालय वैदेशिक रोजगार व्यवस्थापन महाशाखाका उपसचिव डम्बरबहादुर सुनुवारले जानकारी दिनुभयो।
भाषा स्कोरकै कारण योग्य, अनुभवी नर्सहरुले अवसर नपाउने देखिएकाले स्कोरबारे नेपाल र बेलायत पक्षबीच छलफल गर्नुपर्ने अवस्था रहेको उहाँ बताउनुहुन्छ।
उपसचिव सुनुवारका अनुसार पाइलट प्रोग्राम सुरु हुनुअगावै बेलायत सरकारसँग मापदण्डमा भाषा स्कोर ६.५ या ६ लाई मान्यता दिन प्रस्ताव गरिएको थियो । बेलायत पक्षले आफ्नो न्यूनतम मापदण्ड नै न्यूनतम ७ रहेको जवाफ दियो। तर भाषा स्कोरकै कारण पाइलट प्रोगाममै मागिएको भन्दा कम नर्स योग्य भएपछि यो प्रोजेक्टपछि भाषा स्कोरका विषयमा थप छलफल गर्नुपर्ने देखिएको उहाँले बताउनुभयो।
आवेदन दिन इन्टरनेशनल इङ्लिश ल्याङ्वेज टेस्टिङ सिस्टम (आईईएलटीएस) र अकुपेस्नल इंग्लिस टेस्ट (ओइटी )भाषालाई अनिवार्य गरिएको थयो ।
जसमा (आईईएलटीएस) तर्फ समग्रमा कम्तिमा ७ स्कोर र लिखितमा कम्तिमा ६.५ ल्याएको हुनुपर्ने र ओइटीको हकमा भने रिडिङमा ग्रेड बी तथा लिस्निङ र राइटिङमा ग्रेड सी आएपनि हुने मापदण्ड तोकिएको थियो । आवेदन दिन उमेर तोकिएको थिएन।
पाइलट प्रोग्राम’का लागि योग्य देखिएका नर्समध्ये ६६ जनाले ओइटी र १० जनाले आईईएलटीएस गरेका छन् । ओइटी भाषातर्फ नै नर्सहरू बढी आकर्षित भएको देखिएको सुनुवारले जानकारी दिनुभयो।
बेलायत र नेपाल सरकारबीच २०७९ भदौ ६ गते नेपाली स्वास्थ्यकर्मीलाई शून्य लागतमा बेलायत लैजान सम्झौतापत्रमा हस्ताक्षर भएको थियो । उक्त सम्झौतापत्रमा शून्य लागतमा लैजाने नर्सको सेवा सुविधा पनि बेलायतमा काम गरिरहेका नर्ससरह हुने उल्लेख गरिएको छ । आवेदन दिएर बेलायत गएका नर्सहरु ५ वर्ष काम गरेपछि नेपाल फर्कनुपर्ने भनिए पनि सो बारे सम्झौतापत्रमा लिखितरुपमा उल्लेख छैन।
सम्झौता अनुसार बेलायत जान चाहने इच्छुक नर्सहरूका लागि सरकारले गत जुलाई २० मा सूचना निकालेर आवेदन माग गरेको थियो।आवेदन भर्ने समय ९० दिनको थियो । त्यो समय यही अक्टोबर १९ तारिखमा सकिएको छ।
तर तोकिएको अवधिमा सबै कागजपत्र र मापदण्ड पूरा गरेर आवेदन फारम बुझाउनेको सङ्ख्या ७६ जना मात्रै छ। आवेदन भने ७७१ जना नर्सले दिएका छन् । नेपाल सरकारबाट सम्बन्धन प्राप्त संस्थाबाट स्टाफ नर्स, स्नातक र स्नातकोत्तर पास गरेका नर्सले आवेदन दिनसक्ने सर्त राखिएको थियो । दर्तावाल अस्पतालमा हालै कम्तिमा २ वर्ष काम गरेको अनुभवी नर्सले आवेदन दिनसक्ने भनिएको थियो।
मापदण्ड पुगेका नर्स बेलायत पठाउन अबको प्रक्रिया के हुन्छ ?
वैदेशिक रोजगार व्यवस्थापन महाशाखाका उपसचिव डम्बरबहादुर सुनुवारका अनुसार नोभेम्वर १ पछि वैदेशिक रोजगार विभागले प्रारम्भिक सूची बनाएर बेलायत पक्षलाई सूची पठाइनेछ । स्वास्थ्य परीक्षण, बीमालगायतका विषयमा तयारी गरिनेछ ।
२०२४ अप्रिलको पहिलो हप्तादेखि छानिएका नर्सलाई बेलायत पठाउन सुरु गरिने उहाँले बताउनुभयो । बेलायत गएपछि नर्सहरूको ३ महिनाको परीक्षणकाल हुन्छ । त्यो समयमा उनीहरुले ब्याण्ड ४ को जागिर खाने र तलब मासिक २२९९ पाउण्ड हुनेछ । ३ महिनापछि त्यहाँको परीक्षा दिनुपर्छ र पास भएमा बेलायत सरकारको नियमअनुसार न्यूनतम ब्याण्ड ५ को जागिर पाउने र त्यहाँको नर्सिङ काउन्सिलमा दर्ता हुनेछन् ।
नर्सहरुले ५ वर्ष काम गर्न पाउनेछन् । सुरुमा ३ वर्षको अवधिका लागि नर्सहरु बेलायत जाने र ३ वर्षपछि २ वर्ष म्याद थपिनेछ । ५ वर्षपछि नेपाल फर्कनै पर्ने लिखित सम्झौतामा उल्लेख गरिएको छैन ।तसर्थ त्यसपछिका व्यवस्थाहरु बेलायतको नियमअनुसार हुनेछ ।
पाइलट प्रोजेक्टपछिको उपलब्धीपछि अन्य स्वास्थ्यकर्मीलाई पनि अवसर दिने विषयमा आन्तरिक छलफल भइरहेको उहाँले बताउनुभयो । नेपालमै स्वास्थ्यकर्मीहरुको अभाव हुनसक्ने चिन्ता बढिरहेको सन्दर्भमा उहाँले नेपालको आवश्यकता अनुसारमात्रै बेलायतमा थप नर्स पठाइने सहमति भएको छ ।
‘अहिले यति नै संख्यामा नर्स पठाउने भन्नेबारे सम्झौता भएको छैन । बेलायतमा नर्सको माग धेरै रहेको हो तर नेपालमा अभाव गराएर बेलायतमा नर्स पठाउने सहमति भएको छैन । स्वदेशमै अभाव भएको परिस्थितिमा यो कार्यक्रम बन्द गरिनेछ, सुनुवारले थप्नुभयो ।
तपाईँको अभिमत