भेरी घटना : चिकित्सक संघद्वारा कालो दिन घोषणा, कालोपट्टी बाँधेर काम गर्न अपिल
स्वास्थ्यसंग आवद्ध संघसंस्थाहरुले घटनाको चर्को विरोध
हेल्थपाटी - जेष्ठ १४, २०७८ १३:०६ मा प्रकाशित
अ +
अ -
काठमाडौं । भेरी अस्पतालमा डाक्टर तथा नर्स कुटेको घटनाको शीर्ष नेतादेखि विभिन्न संघ संस्थाहरुले भत्र्सना गरेका छन् । विभिन्न स्वास्थ्यसंग आवद्ध संघसंस्थाहरुले घटनाको चर्को विरोध गर्दै दोषीलाई कडा कारबाहीको माग गरेका छन् । घटनामा दोषीलाई कडा कारबाही गर्न माग उनीहरुले गरेका छन् ।
नेपाल चिकित्सक संघले हिजोको घटनालाई कालो दिनको घोषणा गर्दै आज एक दिन कालोपट्टी बाँधेर काम गर्न सबै स्वास्थ्यकर्मीहरुलाई अपिल गरेको छ ।
घटनामा दोषीलाई मन्त्रिपरिषद निर्णय अनुसार कडा भन्दा कडा कारवाही गरि देशभरका चिकित्सक तथा स्वास्थ्यकर्मीहरुलाई कामबाट बिमुख हुने बाध्यात्मक परिस्थितिको सिर्जना नगर्न संघले सरकारकासँग माग गरेको छ ।
बिराट मेडिकल कलेज बिराटनगरमा स्वास्थ्यकर्मीमाथी भएको हातपातको घटनाको एक हप्ता पनि नबित्दै भेरी अस्पतालमा भएको दुखद घटनाले संघ मर्माहित भएको जनाएको छ ।
यसैगरी सरकारी चिकित्सक संघ गोदानले पनि घटनाको निन्दा गर्दै दोषीलाई हदैसम्मको अपराध मुद्धा चलाई कारबाही गर्न सरकारसँग माग गरेको छ ।
यस्तै नेपाल नर्सिङ संघले पनि घटनाको विरोध गरेको छ भने राष्ट्रिय स्वास्थ्यकर्मी संघले दोषीलाई कारबाही नगरे स्वास्थ्यकर्मी सुरक्षाका लागि देशभर आन्दोलन चर्काउने चेतावनी दिएको छ ।
यस्तै हेल्थ असिस्टेन्ट संघ नेपालले घटनाप्रति गम्भिर ध्यानाकर्षण भएको जनाउदै घटनाको सत्यतथ्य छानबीन गरि दोषीलाई कानुनी दायरामा ल्याउन सरकारसँग माग गरेको छ ।
अस्पतालमा शुक्रबार राती ८ वजेतिर बिरामीको मृत्युको विषयलाई लिएर मृतकका आफन्तहरुले आइसियु कक्षमै गएर डाक्टर तथा नर्सहरुमाथि सांघातिक आक्रमण गरेका थिए ।
उनीहरुले ड्युटीमा खटिएका स्वास्थ्यकर्मीहरुलाई लखेटी लखेटी जहाँ भेटिन्छन् त्यही लातीले हान्ने तथा घाँटी अठ्याउने जस्ता अमानवीय हर्कत देखाएका थिए ।
थप आक्रमणबाट बच्न नर्सहरू भागेर शौचालयतर्फ जाँदापनि त्यहाँ पनि लखेटेपटि एक जना डाक्टर र ३ जना नर्स ज्यान जोगाउन छतबाट हाम फालेका थिए । हेल्थपाटीले यो घटना सार्वजनिक गरेको थियो ।
Press Release 2078-02-14
तपाईँको अभिमत