भेरी घटना अपडेट : २ जना प्रहरी नियन्त्रणमा, स्थिति अझै तनावग्रस्त
वार्ता जारी
काठमाडौं । नेपालगञ्जस्थित भेरी अस्पतालमा बिरामीको मृत्युको विषयलाई लिएर आफन्तहरुले स्वास्थ्यकर्मीहरुलाई अन्धाधुन्द कुटपिट गरेपछि अहिले अस्पताल तनावग्रस्त भएको छ । उपचारका क्रममा दाङको एक पुरुष संक्रमितको मृत्यु भएपछि आफन्त तथा भिजिटरहरुले स्वास्थ्यकर्मीहरुलाई लखेटी लखेटी कुटपिट गरेका थिए ।
ज्यान जोगाउन एक जना डाक्टर र ३ जना नर्स झ्याल फोरेर २ तलाबाट हाम फाल्नुभएको थियो । त्यतिबेला ड्युटीमा डा.दिपक गुप्ता, डा. चन्द्रप्रकाश शाहु, डा.समा अनसारी, स्टाफ नर्सहरु आश्वीन गुरुंग, सदिक्षा गैरे र बन्दना श्रेष्ठ हुनुन्थ्यो । स्वास्थ्यकर्मीलाई अन्धाधुन्द कुटपिट गर्न थालेपछि झ्यालको सिसा फोडेर डा.शाहु, नर्सहरु सदिक्षा, बन्दना र आश्वीनले हामफालेर ज्यान जोगाउनुभएको छ ।
हाम फालेका सबैजनाको उद्धार गरिएको र अवस्था सामान्य रहेको अस्पताल मेसु डा.प्रकास थापाले जानकारी दिनभयो । बाक्लो मात्रामा सुरक्षाकर्मी खटिएकाले केही स्वास्थ्यकर्मीहरु बिरामीको उपचारमा खटिएको र केही छलफलमै सहभागी रहेको उहाँले बताउनुभयो ।
दिनरात जोखिम मोलेर बिरामीको उपचारमा खटिरहँदा स्वास्थ्यकर्मीमाथि हातपात हुनु निकै दुखद र निन्दनीय हर्कत भएको भन्दै मेसु थापाले स्वास्थ्यकर्मीको सुरक्षाको प्रत्याभुति र दोषीलाई कारबाहीको माग गर्नुभयो ।
अहिले प्रहरी, नेपाल मेडिकल एसोसियसन र नर्सिङ संघबीच वार्ता भइरहेको छ । घटनामा संलग्न २ जना प्रहरी नियन्त्रणमा रहेको र वार्ता भइरहेको बाँकेका प्रमुख जिल्ला अधिकारी शिवराम गेलालले जानकारी दिनुभयो । अस्पतालमा अहिले १७५ जना बिरामीको उपचार भइरहेको छ ।
तपाईँको अभिमत