१ लाख डोज कोभिशिल्ड बाँकी, दोस्रो डोजकाे पर्खाइमा १३ लाख, कहिले पाउने खाेप ?
तुलसा घिमिरे- जेष्ठ ०६, २०७८ १९:३१ मा प्रकाशित
अ +
अ -
काठमाडौं । भारतमा निर्मित कोरोना विरुद्धको खोप कोभिशिल्डको उत्पादनकर्ता सेरम इन्स्टिच्यूटले केही महिना अरु देशलाई खोप नदिने बताएपछि १३ लाख ६० हजार बढीले पाउनपर्ने दोस्रो मात्राको खोप अनिश्चित भएको छ ।
संक्रमण बढिरहेकाले सेरमले खोपको प्राथमिकतामा आफ्नै देशलाई राखेपछि यस वर्षको अन्त्यसम्म नेपालसहित अरु देशले खोप नपाउने भएका छन् । पहिलै खरिद गरिसकेका देशको हकमा सेरमले खोप दिने कि नदिने केही खुलाएको छैन । नेपाल सरकारले खरिद गरेको २० लाख मात्रा खोपमध्ये १० लाख मात्रा खोप आउन बाँकी छ ।
कोभिशिल्ड पहिलो मात्रा लगाएको ८ देखि १२ हप्ताभित्र दोस्रो मात्रा दिनपर्ने व्यवस्था भएअनुसार दोस्रो प्राथमिकतामा परेका व्यक्तिहरुले जेठको तेस्रो सातासम्म दोस्रो मात्रा लगाइसक्नुपर्छ ।
दोस्रो प्राथमिकतामा परि पहिलो मात्रा लगाएका व्यक्तिको संख्या १३ लाख ६४ हजार ७०१ रहेको छ जसमध्ये ९ लाख जेष्ठ नागरिक छन् । उनीहरुले फागुन २३ देखि चैत ३ गतेसम्म पहिलो मात्रा लगाएका थिए । सो अवधिमा ५५ वर्षभन्दा माथिका उमेर समूह लाई, महाविद्यालय,विद्यालयका प्राध्यापक, शिक्षक तथा कर्मचारीहरु, सार्वजनिक यातायातका चालक, सह–चालकहरुले खोप पाएका थिए ।
पहिलो प्राथमिकतामा परेका स्वास्थ्यकर्मी, सफाई कर्मचारी, शव व्यवस्थापक, महिला स्वास्थ्य स्वयमेसेविका, एम्बुलेन्स चालक, खोप केन्द्रमा खटिने सुरक्षाकर्मी,पत्रकार, कैदी, बैंकका कर्मचारी,सरकारी कर्मचारीहरुले माघ १४ देखि फागुन १० गतेसम्म पहिलो मात्रा लगाएका थिए ।
उनीहरुले दोस्रो मात्रा लगाइसकेका छन् । उनीहरुलाई वैशाख ७ देखि ११ गतेसम्म दोस्रो मात्रा दिइएको थियो । अहिले बाँकी रहेको करीब १ लाख मात्रा कोभिशिल्ड, यसअघि दोस्रो मात्रा लिन छुटेका अग्रपंक्तिमा खटिएका तथा पहिलो प्राथमिकतामा परेका व्यक्तिहरुलाई दिने निर्णय भएको परिवार कल्याण महाशाखा खोप शाखा प्रमुख डा. झलकशर्मा गौतमले जानकारी दिनुभयो ।
जिल्ला स्वास्थ्य कार्यालयहरुमा खोपको मौज्दातको स्थिति हेरेर उनीहरुले नै छुटेकाहरुका लागि समय तोक्ने उहाँले बताउनुभयो । फागुन २३ गतेपछि पहिलो मात्रा लगाएकाहरुलाई भने खोप आएपछि दोस्रो मात्राको मिति तोकिने र खोपका लागि पहल भइरहेको उहाँले बताउनुभयो ।
नेपालमा अहिलेसम्म भित्रिएको खोप
कोभिशिल्ड
भारत सरकारबाट १० लाख कोभिशिल्ड अनुदानमा पाएको थियो भने १० लाख मात्रा किनेको थियो । साथै कोभ्याक्स सुविधा मार्फत ३ लाख ४८ हजार, भारतीय सेनाले सहयोग स्वरुप नेपाली सेनालाई प्रदान गरेको १ लाख मात्रा गरि जम्मा २४ लाख ४८ हजार मात्रा कोभिशिल्ड नेपाल भित्रिएको थियो ।
जसमा १ लाख नेपाली सेनालाई हस्तान्तरण गरिएको थियो भने बाँकी २३ लाख ४८ हजार मात्रा खोप, जोखिमका आधारमा प्राथमिकता निर्धारण गरि दुई चरणमा दिइएको थियो ।
भेरोसिल
यस्तै अहिले चलिरहेको भेरोसिलको दोस्रो मात्रा लगाउने खोप अभियानमा चीन सरकारले अनुदानमा दिएको ८ लाख मात्रा खोपमध्येबाट प्रयोग भइरहेको छ । भेरोसिलको पहिलो मात्रा २ लाख ८८ हजार ८३० जनाले लगाएका छने भने जेठ ५ गते (हिजो)सम्म ८१ हजार जनाले दोस्रो मात्रा लगाएका छन् ।
भेरोसिलको पहिलो मात्रा लगाएको संख्याका आधारमा उनीहरुलाई छुट्याएर करीब ३ लाख नयाँ व्यक्तिलाई लगाउन पुग्ने खोप छ । तर यसबारे थप निर्णय भएको छैन । भेरोसिल अहिले १८ देखि ५९ वर्ष उमेरका व्यक्तिलाई दिइएको छ ।
असार मसान्तसम्म ५५ वर्षभन्दा माथिका ३७ लाख जनसंख्याले खोप पाइसक्ने भनिएको थियो,
फागुन २३ गतेदेखिनै ५५ वर्षमाथिका व्यक्तिलाई खोप दिने तयारी सरकारले थियो तर खरिद गरेको खोपपनि पुरा ल्याउन नसकेपछि सरकारले ६५ वर्षमाथिका व्यक्तिलाई मात्रै खोप दिने निर्णय गरेको थियो ।
फागुन २२ गते स्वास्थ्य मन्त्रालयमा भएको पत्रकार सम्मेलनमा स्वास्थ्य मन्त्री हृदयेश त्रिपाठीले २०७८ सालको असार मसान्तसम्म ५५ वर्षभन्दा माथिका ३७ लाख जनसंख्याले कोरोनाको खोप पाइसक्ने बताउनुभएको थियो । तर कोरोना अभियान सुरु भएयता कोभिशिल्ड र भेरोसिलको पहिलो र दोस्रो मात्रा गरि करीब २५ लाख ७० हजार जनाले मात्रै खोप लगाउन पाएका छन् ।
कोभिशिल्डको पहिलो र दोस्रो मात्रा गरि २२ लाख र भेरोसिलको पहिलो र दोस्रो मात्रा गरि झण्डै ३ लाख ७० हजार जनाले खोप लगाएका छन् । एक मात्रा खोप पनि लगाउन नपाएकाहरु कुरेर बसिरहेका छन् । तर कुन खोप कहिले आउँछ त्यसको निधो छैन ।
भारतको कोभिशिल्ड, कोभ्याक्सिन, चीनको भेरोसिल र रुसको स्पुतनिक खोपले आपत्कालिन प्रयोगको अनुमति पाएपनि नेपालमा कोभ्यासिन र स्पुतनिक खोप भित्रिएका छैनन् । भारतमै माग बढिरहँदा कोभिशिल्ड र कोभ्याक्सिन तत्काल ल्याउने स्थिति नरहेपनि भेरोसिल र स्पुतनिक खोप ल्याउन सरकारले चासो नदिएको भन्दै जनताको आक्रोस बढ्न थालेको छ ।
तपाईँको अभिमत