वीरमा करारका कर्मचारी हटाएका मन्त्री बस्नेतले सिनेटमार्फत आफ्ना मान्छे भर्ती गर्दै
हेल्थपाटी - आश्विन २७, २०८० ०९:१९ मा प्रकाशित
अ +
अ -
स्वास्थ्यमन्त्री मोहनबहादुर बस्नेतले चिकित्सा विज्ञान राष्ट्रिय प्रतिष्ठान न्याम्स सभा (सिनेट)को बैठक डाकेर नयाँ दरबन्दी सिर्जना गरी आफ्ना मान्छे भर्ती गर्ने तयारी गर्नुभएको छ ।
चिकित्सा विज्ञान राष्ट्रिय प्रतिष्ठान न्याम्स उच्च स्रोतका अनुसार मन्त्री बस्नेतले भोलि सिनेट बैठक बोलाउनुभएको छ । भोलि घटस्थापनाको सार्वजनिक बिदा हो । बिदाको दिन बैठक डाकी नयाँ दरबन्दी सिर्जना गर्ने निर्णयको तयारी भएको स्रोतले हेल्थपाटीलाई जानकारी दिएको छ ।
सिनेटको अध्यक्षमा स्वास्थ्य मन्त्री, सदस्यहरूमा न्याम्सका उपकूलपति, रजिष्ट्रार, पाटन एवं राप्ती स्वास्थ्य विज्ञान प्रतिष्ठानका उपकूलपति एवं कोशी अस्पताल र प्रसूती अस्पतालका मेसु रहनुभएको छ ।
स्रोतका अनुसार करारमा हटाएका डाक्टर, नर्स एवं कर्मचारीभन्दा धेरै संख्यामा सिनेटले करार दरबन्दी सिर्जना गर्ने तयारी भएको छ । बजेट अभाव भन्दै वीर अस्तपालमा कोभिड–१९ को समयमा नियुक्त गरिएका १८५ जना नर्ससहित २७६ जना कर्मचारीलाई यही असोज २१ गतेबाट लागू हुनेगरी हटाइएको थियो ।
यति ठूलो जनशक्ति निकालिदा अस्पतालको सेवा प्रभावित भएको छ । २३ आइसीयू बेड बन्द भएका छन् । सेवा प्रभावित भएपछि वीरका विभागीय प्रमुखहरु मन्त्री बस्नेतलाई भेट्न गएका थिए । भेटमा विभागीय प्रमुखहरुले डाक्टर, नर्स एवं स्वास्थ्यकर्मी निकालिएपछि सेवा प्रभावित भएको जानकारी गराएका थिए ।
मन्त्री बस्नेतले कुन-कुन विभागमा कति स्वास्थ्यकर्मी चाहिन्छ, सोको खाका बनाउनुस् सेवा प्रभावित हुनै दिनुहुन्न, चाहिने जनशक्ति म नियुक्त गरौंला भन्ने जवाफ दिनुभएको न्याम्स उच्च स्रोतले हेल्थपाटीलाई जानकारी दिएको छ ।
‘भएका करारका कर्मचारी हटाउनुभयो, कर्मचारी हटेपछि सेवा प्रभावित भयो भन्ने देखाएर अहिले फेरि कर्मचारी राख्ने तयारीमा हुनुन्छ, स्रोतले भन्यो, 'प्रतिष्ठानलाई आर्थिक बोझ थपी आफ्ना मान्छे राख्ने खेल रहेछ।’
सरकारी करारमा कर्मचारी हुँदा सरकारले तलव दिनपर्थ्यो, तर सिनेटबाट राखिएका जनशक्तिलाई प्रतिष्ठानको आन्तरिक स्रोतले नै तलब खुवाउनपर्छ ।
जागिर खोसिएपछि अन्यायमा परेको भन्दै नर्सहरूले पटक-पटक भेट्न खोज्दा मन्त्री बस्नेतले भेट्ने समय नदिएको नर्सहरूको गुनासो छ।
तपाईँको अभिमत