२७६ चिकित्सक, स्वास्थ्यकर्मी निकालिए, वीरलाई देखाएर मन्त्रीज्यू खुसी हुने कहिलेसम्म ?

वीर अस्पतालमा कोरोना महामारीका बेला नियुक्त गरिएका २७६ चिकित्सक स्वास्थ्यकर्मीको जागिर खोसिएको छ। 

अहिलेको आर्थिक अवस्थाले यो जनशक्ति नधान्ने भन्दै चिकित्सा विज्ञान राष्ट्रिय प्रतिष्ठानले करार सेवा थप्न नसकिने निर्णय गरेको छ।

असोज २१ गतेबाट काममा नआउन चिकित्सक, स्वास्थ्यकर्मीलाई भनिएको छ।

वीर अस्पताल स्रोतले दिएको जानकारी अनुसार २७६ मध्ये केहीले बीचमा आफैँ छाडिसकेका छन्। ५० डाक्टर, १६२ नर्स,  ११ प्रयोगशाला प्राविधिक, ७ रेडियोलोजिस्ट लगायतलाई जागिरबाट निकालिएको छ। 

अहिले हटाइएका स्वास्थ्यकर्मीहरू वीरलाई आवश्यक भएकै जनशक्ति रहेको न्याम्सका एक चिकित्सकले बताउनुभयो। 

पहिलेको तुलनामा वीर अस्पतालको सेवा धेरै विस्तार गरिएको छ । करारमा रहेका यिनै कर्मचारीको बलमा सर्जिकल भवनमा सेवा विस्तार गरिएको थियो। पहिला जम्मा ३५० शैय्या रहेकोमा अहिले ९०० बनाइएको छ। 

 इमर्जेन्सी, आइसीयू, अप्रेसन थिएटर, भीआइपी उपचार जस्ता सेवा बढाइएको छ।  

अहिले वीर लगभग पूर्ण क्षमतामा चलाउन सकिएको न्याम्सका एक चिकित्सकले हेल्थपाटीलाई जानकारी दिनुभयो। 

यी करार कर्मचारी दरबन्दी भन्दा बाहिरका नरहेको दावी ती चिकित्सकको छ। सर्जिकल भवनमा सेवा विस्तार गर्नका लागि भन्दै स्वास्थ्य मन्त्रालयले न्याम्सका लागि थप ८३१ दरवन्दी स्वीकृत गरिसकेको छ। लोकसेवाबाट दरबन्दी अनुसारका कुनै कर्मचारी पूर्ति भएको अवस्था छैन। अहिले हटाइएका कर्मचारीलाई त्यही दरबन्दीभित्रै खटाइएको थियो। 

लोकसेवाबाट दरबन्दीका कर्मचारी नआउँदासम्म यिनै करारका कर्मचारीलाई काम लगाउने भन्ने योजना न्याम्सका अधिकारीहरूको थियो। अघिल्लो वर्ष स्वास्थ्य मन्त्रालय यसमा सहमत भएपछि करार थपिएको थियो। 

सेवाअवधि थप्न सकिन्छ  भन्ने आशा गरेर न्याम्सले कर्चारीलाई काम लगाइरहेको थियो ।

यसपटक स्वास्थ्य मन्त्रीले यो जनशक्ति धान्न सकिँदैन हटाउनै पर्छ भनेपछि न्याम्सको असोज १५ गतेको कार्यकारी परिषद्ले करार सेवा थप गर्न नसकिने निर्णय गरेको हो। 
स्वास्थ्य मन्त्रीमा मोहनबहादुर बस्नेत नियुक्त भएपछि वीर अस्तपालको सेवा विस्तार र सुधार गर्ने भनेर लागिरहनुभएको छ। 

यति ठूलो जनशक्ति हटाएपछि सेवा खस्किने निश्चित भएको वीरका एक चिकित्सक बताउनुहुन्छ। 

‘मन्त्रीज्यू वीरमा राम्रो भएको भन्दै गर्व गर्दै हिँड्नुहुन्छ’ वीरका ती चिकित्सक भन्नुहुन्छ,  ‘ यति ठूलो जनशक्ति नभएपछि सेवा के होला, वीर अस्पताल सुधारियो भनेर उहाँले कहिलेसम्म भन्न पाउनुहोला ?’

वीरको सेवा राम्रो बनाइराख्न पनि यी कर्मचारीहरुलाई हटाउनै नहुने तर्क वीरका ती चिकित्सकको छ। 

कोरोनामा दुखः गरेको र वीरमा काम गरेको अनुभवसमेत हासिल गरिसकेको अवस्थामा  लोसकेवाबाट कर्मचारी नआउँदासम्म राख्नुपर्ने उहाँ बताउनुहुन्छ। 

लोकसेवाबाट कर्मचारी पूर्ति भएपछि करारका कर्मचारी छोड्न बाध्य भइहाल्थे।

अहिले भएका कर्मचारी निकाल्दा वीरमा सेवा खस्किने जानकारी प्रधानमन्त्रीलाई समेत गराइएको थियो। तर समस्या समाधान नभएको न्याम्स स्रोतले हेल्थपाटीलाई जानकारी दिएको छ।