बेलायत जान ४५ जना नर्स मात्रै पास
हेल्थपाटी - मंसिर २२, २०८० १७:०८ मा प्रकाशित
अ +
अ -
नेपाल र बेलायतबीच भएको सम्झौता अनुसार भएको पाइलटिङ कार्यक्रम अन्तगर्त बेलायत जान ४५ जना नर्स पास भएका छन् ।
मंसिर १८ देखि २१ गतेसम्म भएको अन्तर्वार्ताबाट ४५ जना पास भएका हुन् । अन्तर्वार्ताका लागि ७१ जना नर्सहरूको प्रारम्भिक सूची सार्वजनिक गरिएको थियो ।
वैदेशिक रोजगार विभागका अनुसार अन्तर्वार्तामा ६० जनाको सहभागिता रहेको थियो । पाइलटिङ कार्यक्रममा सुरुमा १०० जना नर्स लैजाने सहमती भएको थियो । भाषा परिक्षाको स्कोरका कारण कम नर्सहरुमात्रै अन्तवार्तामा योग्य देखिए ।
बेलायतस्थित ह्याम्पशायर हस्पिटल एनएचएस फाउण्डेशन ट्रष्टका नर्सहरूले नेपालस्थित बेलायती दूतावासमा आमने सामने अन्तर्वार्ता दिएका थिए । अन्तवार्तामा ४५ जना सफल घोषणा गरिएको विभागले जनाएको छ । एचएचएफटी यूके डिपार्टमेन्ट अफ हेल्थ एण्ड सोस केयर (डीएचएससी) द्वारा छनोट गरिएको संस्था हो ।
सफल नर्सहरूलाई छिट्टै उनीहरूको छनोटको बारेमा सूचित गरिने विभागले जनाएको छ । सन् २०२४ को पहिलो त्रैमासिकदेखि नर्सहरू बेलायत पठाइनेछ ।
नेपाल र बेलायत सरकारबीच सन् २०२२ को अगस्टमा एक समझदारी पत्रमा हस्ताक्षर भएको थियो । त्यसमा नेपालबाट नर्सहरूलाई बेलायतमा रोजगारीको अवसर दिने समझदारी भएको थियो ।
तपाईँको अभिमत