प्रत्यारोपण केन्द्रकी डा.अनिषाको अर्को काण्ड : मान्छेको रिस निर्जीव गाडीमाथि
हेल्थपाटी - भाद्र २६, २०७९ २०:४४ मा प्रकाशित
अ +
अ -
शहीद धर्मभक्त राष्ट्रिय प्रत्यारोपण केन्द्रकी सर्जन डा.अनिषा तिवारीको अर्काे काण्ड बाहिर आएको छ ।
प्रत्यारोपण केन्द्रका कार्यकारी निर्देशक डा.पुरकारचन्द्र श्रेष्ठले दुर्व्यवहार गरेको भन्दै डा.अनिषाले विभिन्न निकायमा उजुरी गर्नुभएको थियो।
बिरामीको अप्रेसनका विषयमा भएको विवादको रिस फेर्न उजुरी गरेको डा.पुकारसहित अस्पतालका अन्य चिकित्सक, स्वास्थ्यकर्मीले स्पष्ट पारिसकेका छन्।
बिरामीको उपचारमा लापरबाही गरेकोमा उल्टै डा.अनिषा कारबाहीको भागीदार भएको उनीहरुको आरोप छ ।
यसैबीच डा.अनिषाले अस्पतालकै एक स्वास्थ्यकर्मीको गाडी कोरिदिएको आरोप लागेको छ ।
अस्पतालको अप्रेसन थियटरमा प्राविधिकको रुपमा कार्यरत रामचन्द्र पौडेलको पार्किङमा राखेको गाडीमा डा.अनिषाले कोरिदिएको आरोप लागेको हो ।
डा.अनिषाले आफ्नो गाडीमा कोरिदिएको भन्दै पौडेलले अस्पतालका कार्यकारी निर्देशक डा.पुकारचन्द्र श्रेष्ठलाई पत्र लेख्नुभएको छ ।
पौडेलका अनुसार यही भदौ २३ गते बिहीबार पार्किङमा राखेका बेला बागमती बी एबी ३५१८ नम्बरको निजी गाडीमा डा.अनिषाले कोरिदिनुभएको हो ।
अस्पतालको काममा आएर गाडी पार्किङ गरेको र साँझ ७ बजे घर जानका लागि गाडी लिन जाँदा कोरिएको पाइएको पौडेलले बताउनुभयो।
गाडीको सिसा भन्दा अगाडिको भाग, दायाँ भाग र पछाडिको भागमा समेत कोरिएको पौडेलले बताउनुभयो ।
गाडी नराम्ररी कोरिएको पाइएपछि उहाँले भोलिपल्ट पार्किङलाई समेत कभर गर्ने नजिकैको होटलको सीसी क्यामेराबाट दृश्य नियाल्नुभयो । उक्त सीसी क्यामेरामा हेर्दा डा.अनिषा आएर जथाभावी गाडी कोरिदिएको देखिएको पौडेलले जानकारी दिनुभएको छ । यो पनि पढ्नुहोस् :
डा.अनिषाले आफ्नो सम्पतिमा क्षति पुर्याएकाले प्रचलित कानुन बमोजिम कारबाहीको माग गर्दै पौडेलले प्रहरीमा शुक्रबार उजुरी समेत दिनुभएको छ।
उजुरी परेपछि भक्तपुर प्रहरी वृत्त दूधपाटीले आइतबार डा.अनिषालाई बोलाएको थियो । १ बजे प्रहरीकोमा उपस्थित हुनुभएकी उहाँले सुरुमा आफूले उक्त कार्य नगरेको जिकिर गर्नुभयो ।
स्रोतका अनुसार प्रहरीले सीसीटीभीको भिडियो देखाएपछि उहाँले केही जवाफ दिनुभएन । मेरो जरुरी काम छ ३ बजे आउँछु भनेर निस्कनुभयो तर आउनुभएन।
रामचन्द्रले डा.अनिषामाथि हदैसम्मको कारबाही गर्न कार्यकारी निर्देशक डा.पुकारसमक्ष पनि माग गर्नुभएको छ ।
डा.अनिषासँग आफ्नो कुनै व्यक्तिगत रिसीबी नरहेको पौडेलको दावी छ ।
उहाँका अनुसार केहीदिन पहिले उहाँहरु अप्रेसन थिएटरमा बसेका बेला डा.अनिषाले भिडियो खिच्दै हुनुहुन्थ्यो। आफूले उक्त भिडियो नखिच्न भनेकोमा रिसाएको उहाँले जानकारी दिनुभयो।
केन्द्रमा अस्थायी, स्थायी कर्मचारीबीच विवाद भइरहेको र यसैको रिसीबी साध्न गाडीमाथि क्षति पुर्याएको हुनसक्ने अनुमान पनि पौडेलको छ।
बिरामीको अप्रेसन गर्ने सर्जन जस्तो मान्छेले यति तुच्छ खालको हर्कत गर्नु निन्दनीय काम रहेको पौडेल बताउनुहुन्छ।
‘त्यस्तो सम्वेदनशील क्षेत्रमा काम गर्ने डाक्टरले यतिसम्म इगो देखाउन मिल्छ ? यस्तो मानसिकता भएको मान्छेलाई बिरामीको अप्रेसन गर्न दिने कि नदिने ?’ पौडेल प्रश्न गर्नुहुन्छ।
उहाँको मतहतमा रहेर अप्रेसन थिएटरमा काम गर्नसमेत संकोच मान्नुपर्ने अवस्था आएको पौडेल बताउनुहुन्छ।
डा.अनिषालाई साउन २४ गतेको घटनाको विषयमा प्रत्यारोपण केन्द्रको व्यवस्थापनले एक साताअघि स्पष्टीकरण सोधेको थियो। बिरामी भएको लगायतका कारण देखाउँदै विदामा बस्नुभएकी उहाँले शुक्रबार बिहान आएर पत्र बुझ्नुभएको प्रत्यारोपण केन्द्रको प्रशासनले जानकारी दिएको छ।
तपाईँको अभिमत