कर्णाली स्वास्थ्य विज्ञान प्रतिष्ठान : डाक्टरी पढाइ सुरु भयो, सेवा बढ्यो
एक वर्षमा भएका प्रगति विवरण
कर्णाली स्वास्थ्य विज्ञान प्रतिष्ठान जुम्लामा एमबीबीएस पढाइदेखि विशेषज्ञ सेवा सञ्चालन भइरहेको छ । शिक्षा तथा उपचारतर्फ पनि सेवा विस्तार हुँदा भाैतिक पूर्वाधारको अभाव देखिएको छ ।
प्रतिष्ठानका उपकुलपति डा.मंगल रावलले जिम्मेवारी सम्हालेको एकवर्ष पुगेको अवसरमा आइतबार समीक्षा बैठक आयोजना गर्नुभएको थियो । बैठकमा डा.रावलले प्रतिष्ठानको प्रगति विवरणबारे चर्चा गर्नुभयो । चिकित्सा शिक्षा आयोगबाट पहिलो पटक एमबीबीएस, बीएनएस बी फर्मा लगायत नयाँ कार्यक्रमको निरीक्षण गराइ यी सबै बिषयमा अध्ययनका निम्ति अनुमति लिन सफल भएकोमा खुसी व्यक्त गर्नुभयो ।
गत चैत २२ गते रावल प्रतिष्ठानको उपकुलपतिमा नियुक्त हुनु भएको थियो। रावलले एमबीबीएसको सिट संख्या बढाउन जरुरी रहेको बताउनुभयो । हालै प्रतिष्ठानमा २० सिटबाट एमबीबीएसको पढाइ सुरु भएको छ ।
उपकुलपति रावलका अनुसार एमडी/एमएस, एमबीबीएस, बीएनएस, बीएमएस, बीपीएच लगायतका कार्यक्रम सञ्चालन गर्न केन्द्रीय अस्पतालहरूसँग सम्झौता भएको छ । गंगालाल हृदयरोग केन्द्र, भेरी अञ्चल अस्पताल, बाँके, लुम्बिनी अञ्चल अस्पताल, बुटवल, सुशिल कोइराला प्रखर क्यान्सर अस्पताल बाँके, मिसन अस्पताल पाल्पा, नेपाल अर्थापेडिक अस्पताल जोरपाटीसँग सम्झौता भइसकेको डा.रावलले जानकारी दिनुभयो ।
शिक्षातर्फ भएको प्रगतिबारे जानकारी दिदै उहाँले हाडजोर्नी विषयमा स्नाकोत्तरको नयाँ अध्ययन सुरु गरिएको बताउनुभयो ।
‘प्रतिष्ठानको अस्पतालमा थप छालारोग, आँखा रोग, नाक कान घाँटी, बाल दन्तरोग विशेषज्ञ सेवा बिस्तार भएको छ । नाक, कान घाँटीको अपरेशन सेवा सुरु भएको छ। हिस्टो प्याथोलोजी सेवा पनि यसै शुरु भएको छ' समीक्षा बैठकमा रावलले भन्नुभयो, 'पाठेघरको मुखको पूर्व क्यान्सरको अवस्थालाई थर्मोकोगुलेसन पद्धतिबाट उपचार सुरु भएको छ । जन्मदेखि २८ दिनसम्मका नवजात शिशुको सघन उपचार सेवा सुचारु भएको छ।'
समीक्षा बैठकमा रावलले २५ बेडको एचडीयू सेवा ५० बेडमा स्तरोन्नति गर्न सफल भएको जानकारी दिनुभयो । ६ बेडको सघन बालरोग उपचार कक्षको निर्माण भइरहेको तथा थप ६ बेडको मेडिकल आइसीयू स्थापना भएको छ । थप ६ वटा भेन्टिलेटरसहित जम्मा १८ वटा भेन्टिलेटरको व्यवस्था गरिएको छ । प्रतिष्ठानलाई यो स्थानसम्म ल्याउन सहयोग गर्ने सबैलाई उहाँले धन्यवाद दिनुभयो ।
यद्यपी प्रतिष्ठानमा भौतिक संरचना र पूर्वाधारको अभाव रहेको रावलको भनाइ छ । मेडिकल कलेज, छात्राबास, अस्पताल तथा शैक्षिक भवन स्टाफ क्वार्टर नहुँदा सिनियर शैक्षिक जनशक्ति व्यवस्थापनमा कठिनाइ भइरहेको भन्दै तत्काल भौतिक संरचनाको निर्माण गर्नुपर्नेमा उहाँले जाेड दिनुभयाे ।
९ वटा विविध शैक्षिक कार्यक्रम सञ्चालन भइसक्दा पनि शिक्षक कर्मचारीहरू भाडामा बस्न बाध्य हुनुपरेको उहाँले बताउनुभयो । प्रतिष्ठानले भवन अभावका कारण ६ वटा भवन भाडामा लिएको छ । रावलका अनुसार फ्याकल्टी क्वाटरहरु भने निर्माणका क्रममा छन् ।
तपाईँको अभिमत