निषेधाज्ञाकाे माेडालिटि परिवर्तन हुने, अबदेखि ‘स्मार्ट लकडाउन’
काठमाडौं । काठमाडौं उपत्यकामा जारी निषेधाज्ञाबारे छलफल गर्न आज काठमाडौं, भक्तपुर र ललितपुरका कोभिड–१९ जिल्ला संकट व्यवस्थापन समिति (डिसीसीएमसी) को बैठक बस्दैछ ।
डिसीसीएमसीको बैठकपछि तीन प्रमुख जिल्ला अधिकारीबीच हुने छलफलले थप केही प्रावधानलाई खुकुलो बनाउँदै पसल तथा सेवाहरु खाेलि काठमाडौं उपत्यकामा एक हप्ता निषेधाज्ञा थप्नेबारे निर्णय गर्ने बताइएको छ ।
काठमाडौंका प्रमुख जिल्ला अधिकारी कालीप्रसाद पराजुलीले तीन प्रमुख जिल्ला अधिकारीको बैठक बसेर निषेधाज्ञाको मोडालिटीबारे टुंगो लगाउँने बताउनुभएको छ ।
कोभिड–१९ निर्देशक समिति बैठकले ‘स्मार्ट लकडाउन’ गर्ने निर्णय गरेको थियो । यसको मोडालिटी बनाउने जिम्मा कोभिड–१९ संकट व्यवस्थापन समिति (सीसीएमसी)लाई छ । तर सीसीएमसीले अन्तिम निर्णय गरिसकेको छैन ।
कोरोना संक्रमण धेरै देखिएका क्षेत्रलाई मात्र सिल गरेर परीक्षण र कन्ट्रयाक ट्रेसिङलाई बढाउने प्रावधान ‘स्मार्ट लकडाउन’को प्रावधानमा राख्ने तयारी छ । यसको मोडालिटीमा स्वास्थ्य मापदण्ड पालना गराएर आर्थिक गतिविधिलाई अगाडि बढाउने विषय छ ।
गत वर्ष लकडाउन खुकुलो पार्दै जाँदा प्रशासनले जोर–बिजोर प्रणालीमा सवारी साधन चल्न दिएको थियो ।
यसपालि चाहिं सवारीसाधनको अन्तिम नम्बरको आधारमा बार तोकेर निजी सवारी साधन चलाउन दिने कि भन्ने विषयमा छलफल भइरहेको छ । तर उपत्यकामा निषेधाज्ञाबारे थप निर्णय लिन दुई दिन बाँकी रहँदासम्म सीसीएमसीले यसबारे निर्णय गरिसकेको छैन ।
उपत्यका प्रशासनले पनि सवारीसाधन सञ्चालन गर्न दिने नदिनेबारे विज्ञसँग पनि छलफल गर्ने भएको छ । प्रशासनले कोभिड–१९ भाइरसको दोस्रो लहरको ‘चेन ब्रेक’ गर्ने भन्दै १६ वैशाखदेखि उपत्यकामा निषेधाज्ञा लगाएको थियो ।
तपाईँको अभिमत