विश्व स्वास्थ्य संगठन प्रमुखद्वारा नेपाली स्वास्थ्यकर्मीको प्रशंसा
हेल्थपाटी - आषाढ ०५, २०७८ १३:१६ मा प्रकाशित
अ +
अ -
काठमाडौं । मुस्ताङमा खोलामा बाढी आएपछि कोरोना विरुद्धको खोप जनतामाझ पुर्याउन स्वास्थ्यकर्मीहरुले गरेको जुक्तिको चौतर्फी प्रशंसा भइरहेको छ । असार मुस्ताङ लेतेको छाप्ताङ खोलामा भेल आएपछि स्वास्थ्यकर्मीहरुले पाइपको सहायतामा वारपार बसेर खोप खोला पार गराउनुभएको थियो ।
त्यो क्षणको भिडियो सामाजिक सञ्जालमा त भाइरल भइरहेको छ नै विश्व स्वास्थ्य संगठन प्रमुख डा. अधानोम टेड्रोससमेतले उक्त भिडियोलाई ट्वीट गर्दै नेपाली स्वास्थ्यकर्मीलाई हिरोको संज्ञा दिनुभएको छ । उहाँले ट्वीटमा लेख्नुभएको छ, ‘स्वास्थ्यकर्मीहरुले अरुको जीवन बचाउन कसरी लागिपर्छन भन्ने उदाहरण हो यो । कतिपय देशमा यस्ता हिरोहरुलाई अझै खोप दिइएको छैन । ’
अहिले नेपालमा पनि कोरोना खोप अभियान चलिरहेको छ । मुस्ताङमा असार १ गते खोलाका कारण वारपार गर्न नसक्ने स्थिति रहेकाले स्वास्थ्यकर्मीहरुले वारी र पारी बसेर खोप पास गर्नुभएको थियो ।
यस भिडियोमा देखिएको पीपीई लगाएर खोप लिने व्यक्ति हेल्थ असिस्टेन्ट लालबहादुर रोकाय हुनुहुन्छ । उहाँलाई पारीबाट खोप पास गर्ने व्यक्ति कार्यालय सहयोगी गगत विक हुनुहुन्छ भने भिडियो खिचिदिने व्यक्ति स्टाफ नर्स अञ्जली थकाली हुनुहुन्छ ।
तपाईँको अभिमत