स्वास्थ्यकर्मीकाे साहस : मुस्ताङकाे बाढीमा यसरी खाेलातार्दै खोप अभियान (भिडियो)

काठमाडौं । कोरोना महामारीले आक्रान्त भइरहेको बेला बाढी पहिरोले जनजीवन थप सकस बनाएको छ । भारी वर्षाका कारण देशका विभिन्न स्थानमा बाढी पहिरो गइरहेको छ । सिन्धुपाल्चोकको मेलम्ची डुबानमा छ भने अन्य कतिपय स्थान जलमग्न छ, जनजीवन अस्तव्यस्त छ । 

वर्षायाममा पानीका मुहानहरु फोहोर हुने भएकाले पानीजन्य रोग फैलन सक्ने डर उत्तिकै छ भने बाढी पहिराले विस्थापित बनाउँदा मानिसहरु आश्रय लिन एकैठाउँमा भेला हुनपर्दा कोरोना संक्रमणको जोखिम पनि उस्तै छ । 

यस्तो बेलामा स्थानिय स्तरमा रहेका स्वास्थ्य संस्थाहरु सक्रिय बनाइन्छ, स्वास्थ्य सेवा नियमित प्रवाह गर्न स्वास्थ्यकर्मीहरु कुनै प्रवाह नगरि सेवामा डट्छन् ।  विभिन्न भागमा खोप अभियान पनि चलिरहेको छ । ग्रामीण भेगमा खोलाको वहाव बढ्दा वारपार गर्न सकिने अवस्था छैन र पनि स्वास्थ्यकर्मीहरु विभिन्न जुक्ति निकालेर सेवामा समर्पित भइरहेका छन् ।

अहिले कोरोना खोप अभियान चलिरहेको छ  । मुस्ताङमा पनि कोरोना खोप अभियान जारी छ ।  तर खोलाका कारण वारपार गर्न नसक्ने स्थिति रहेकाले स्वास्थ्यकर्मीहरुले वारी र पारी बसेर खोप पास गरिरहेको दृश्यको भिडियो अहिले सामाजिक सञ्जालमा छाइरहेको छ ।  स्वास्थ्यकर्मीहरुको यो प्रयासलाई सबैले प्रशंसा गर्दै उनीहरुको हौसला बढाइरहेका छन् ।  

६०–६४ वर्षसम्मका व्यक्तिलाई भेरोसिल खोप दिइदैंछ । बाढीका कारण खोला तर्न नसकेपछि स्वास्थ्यकर्मीहरुले जुक्ति निकाली खोप सर्वसाधरणलाई लगाउनु भएको थियो । मुस्ताङ लेतेको छाप्ताङ खोलामा भेल आएपछि स्वास्थ्यकर्मीले यसरी खोप पास गर्नु परेको हो ।यस भिडियोमा पीपीई लगाएर खोप लिने व्यक्ति हेल्थ असिस्टेन्ट लालबहादुर रोकाय हुनुहुन्छ । उहाँलाई पारीबाट खोप पास गर्ने व्यक्ति कार्यालय सहयोगी गगत विक हुनुहुन्छ भने भिडियो खिचिदिने व्यक्ति स्टाफ नर्स अञ्जली थकाली हुनुहुन्छ ।