अंग प्रत्यारोपण समन्वय समितिको अध्यक्षमा डा.पुकारचन्द्र श्रेष्ठ
हेल्थपाटी - आषाढ २६, २०८० २२:३७ मा प्रकाशित
अ +
अ -
अंग प्रत्यारोपण समन्वय समितिको अध्यक्षमा सहिद धर्मभक्त राष्ट्रिय प्रत्यरोपण केन्द्र भक्तपुरका कार्यकारी निर्देशक डा.पुकारचन्द्र श्रेष्ठ नियुक्त हुनु भएको छ ।
मंगलबार बसेको मन्त्रिपरिषदको बैठकले समितिको अध्यक्षमा डा. श्रेष्ठसहित तीन जना सदस्य नियुक्त गर्ने निर्णय गरेको हो । समितिको सदस्यहरुमा डा महेश सिग्देल, डा प्रवीणविक्रम थापा र डा महेश अधिकारीलाई नियुक्त गर्ने निर्णय भएको छ ।
समितिको अध्यक्ष र ३ जना सदस्य नेपाल सरकारले मनोनित गर्ने व्यवस्था रहे बमोजिम स्वास्थ्य तथा जनसंख्या मन्त्रालयको सिफारिसमा अध्यक्ष र सदस्यहरुलाई नियुक्त गरिएको हो । अध्यक्षमा एक जना बरिष्ठ चिकित्सक मनोनयन गर्ने व्यवस्था अनुसार डा. श्रेष्ठलाई अध्यक्षमा नियुक्त गर्ने निर्णय भएको हो ।
समितिको कार्यकाल गत कार्तिक २३ गते सकिएको थियो। मानव शरीरको अंग प्रत्यारोपण नियमित तथा निषेध ऐन २०५५ ले अंग प्रत्यारोपण सम्बन्धमा नीति, योजना तथा कार्यक्रम तयारी गरी सरकारलाई पेश गर्न समन्वय समितिको गठन गर्नुपर्ने व्यवस्था छ ।
समितिमा अरु ५ जना पदेन सदस्य रहनेछन् । जसमा राजपत्रांकित प्रथम श्रेणी वा सो सरह मन्त्रालयको प्रतिनिधि, कानून, न्याय तथा संसदीय मामिला मन्त्रालय, नेपाल मेडिकल काउन्सिल, नेपाल मेडिकल एशोसिएसन समितिको सदस्य रहनेछन् भने स्वास्थ्य सेवा विभागका महानिर्देशक सदस्य सचिव रहने व्यवस्था रहेको छ ।
समितको सचिवालय स्वास्थ्य सेवा विभागमा रहेको छ । समितिको अध्यक्ष तथा चिकित्सक तोक्न नसक्दा प्रत्यारोपणका लागि अस्पताल तथा चिकित्सकलाई अनुमति दिने काम रोकिएको थियो ।
तपाईँको अभिमत