सिएमसीमा १३ घण्टा लगाएर गरियो दोस्रो कलेजो प्रत्यारोपण

काठमाडौं । चितवन मेडिकल कलेज (सिएमसी)मा दोस्रो पटक कलेजोको सफल प्रत्यारोपण गरिएको छ । विगत ९ बर्षदेखि कलेजो रोगको समस्या देखिएको र प्रत्यारोपण विना ज्यान नजोगिने अवस्थामा पुग्नुभएका जाजरकोट कुशे गाउँपालिका वडा नं. ९ का ४७ वर्षका भरतविक्रम शाहीको असार १८ गते १३ घण्टा लगाएर प्रत्यारोपण गरिएको हो ।

प्रत्यारोपणमा सहभागी शल्य चिकित्सक डा.एकानन्द सिहंका अनुसार भरतविक्रमको कलेजोमा रगत जानै नसक्ने ब्लकेज थियो । यस्तो अवस्थालाई चिकित्सकहरु सिरोसिस विथ पोर्टल भेन थ्रोम्बोसिस (पिभिटि) भन्ने गर्दछन् । पिभिटि भएका बिरामीको नेपालमै पहिलो पटक प्रत्यारोपण गरिएको सिंहले जानकारी दिनुभयो । 

उहाँलाई ४८ बर्षकी श्रीमती कमला शाहीले कलेजो दान गर्नुभएको थियो । श्रीमती कमलाको ६० प्रतिशत कलेजो भरतबिक्रममा ट्रान्सप्लान्ट गरिएको छ  । स्वास्थ्यमा सुधार पछि कमलालाई असार २७ गते नै अस्पतालबाट डिस्चार्ज गरिएको छ भने भरतबिक्रमलाई केही दिनमा डिस्चार्ज गरिने सिंहले जानकारी दिनुभयो । 

कलेजो लिने र दिने व्यक्तिको २ देखि ३ महिनामै भए ९० देखि ९५ प्रतिशत पलाएर आउने र दुबै जनाले पहिलाको जस्तै सामान्य जीवन विताउन सक्ने भएकाले प्रत्यारोपणमा डर मान्न नहुने सिंहको भनाइ छ । 

‘काठमाण्डौंमा कलेजोको जाँच तथा उपचार गराउँदै आउनुभएका शाही २ साता अघि चितवन मेडिकल कलेज पुग्नुभएको थियो । सिरोसिस अफ लिभरको ’ए’ ’बी’ ’सी’ स्टेज मध्ये भरतबिक्रम ’सी’ चरणमा पुग्नुभएको थियो, गत फागुनमा ’सी’ चरणमा पुग्नुभएका बिक्रमलाई प्रत्यारोपण नगराएको भए बचाउँन मुस्किल थियो,’ सिंहले भन्नुभयो । 

उहाँको पेटमा पानी भरिएको थियो । अल्कोहलका कारण शाहीको कलेजो बिग्रनुका साथै हेपाटाइटिस ’बी’ को पनि समस्या देखिएको थियो । सिरोसिस भएका १० देखि १ ५ प्रतिशत बिरामीलाई पिभिटिको समस्या देखिने गरेको पाइएको छ । 

शाहीको प्रत्यारोपणमा शल्य चिकित्सकहरु डा. सञ्जय कुमार यादव, डा.जयन्त कुमार शाह,हेपाटोलोजी डा.सागर पौडेल, डा. बरुण श्रेष्ठ सहभागी हुनुहुन्थ्यो । यसैगरी एनेस्थेसिया तथा क्रिटिकल केयर तर्फ डा.किरण अधिकारी, डा. नविन यादव,डा शुरेस गौतम, डा.विरेन्द्र राउत रेडियोलोजिष्ट डा. दिपक अधिकारी डा. सुवास ओझा हुनुहुन्थ्यो । 

स्टाफ नर्सहरु कमला क्षेत्री, प्रेयंका पौडेल, सलिना तिवारी, सुमि कार्की, बर्षा लोहनी, प्रतिमा रेग्मी, अस्मिता भण्डारी, सदिपा देवकोटा, कृति चोधरी, अञ्जु थापा, श्रुती यादव, नितु बस्नेत सुष्मा भुजेल अनिता भण्डारी रहनुभएको थियो । प्रत्यारोपणमा सहयोग गर्न  भारतबाट डा. निरभ गोयलको टिम आउनुभएको थियो । यसअघि चैत ८ गते सिमसिमा कलेजो प्रत्यारोपण भएको थियो जुन उपत्यका बाहिरको पहिलो थियो । 

चितवन मेडिकल कलेजले गर्यो काठमाडौं बाहिर पहिलो कलेजो प्रत्यारोपण