सातामा २ दिन बिदा : डाक्टर खुसी, मन्त्रालय भन्छ-हुँदैन
नेपाल चिकित्सक संघ (एनएमए)ले सातामा २ दिन बिदा दिने सरकारको निर्णयको स्वागत गरेको छ । संघले आइतबार विज्ञप्ति जारी गर्दै स्वास्थ्य क्षेत्रमा पनि उक्त बिदा लागू गर्न माग गरेको छ ।
वैशाख १३ गते बसेको मन्त्रिपरिषद्को बैठकले जेठ १ गतेदेखि सातामा २ दिन बिदा दिने निर्णय गरेको थियो । स्वास्थ्य तथा जनसंख्या मन्त्रालयका केही अधिकारीहरूले भने स्वास्थ्य संस्थामा २ दिन बिदा दिन नहुने भनाइ राख्दै आउनुभएको छ ।
स्वास्थ्य मन्त्री विरोध खतिवडाले स्वास्थ्य क्षेत्रमा सातामा २ दिन कुनै पनि हालतमा बिदा नहुने र ओपिडी सेवा वन्द नहुने बताउनु भएको छ। बिरामी मारमा पर्ने भएकाले लगातार २ दिन बिदा दिन नहुने मन्त्री खतिवडाको भनाइ छ ।
सातामा २ दिन बिदा हुँदा चिकित्सकले आराम गर्ने समय पाउने र दवावमुक्त अवस्थामा काम गर्न पाउने भएकाले निर्णय राम्रो भएको जिकिर चिकित्सक संघको छ ।
अहिले हप्ताको ४२ घण्टा काम गर्दा डाक्टरहरुलाई बढी लोड भएको नेपाल चिकित्सक संघका महासचिव डा.बद्री रिजाल बताउनुहुन्छ । दुई दिन बिदा दिँदा त्यो लोड कम हुने भएकाले पनि त्यो स्वागत योग्य काम भएको उहाँको ठहर छ ।
‘सातामा २ दिन बिदा हुँदा डाक्टरलाई काममा प्रेसर नहुने भएकाले राज्यले गरेको यस निर्णयलाई सकारात्म भनेका हौँ' डा.रिजाल भन्नहुन्छ, ‘यसले डाक्टरहरुको क्वालिटी लाइफ हुन्छ भन्ने विश्वास लिएका छौँ।’
सातामा २ दिन बिदा दिँदा डाक्टरहरुले परिवारसँग घुलमिल हुने समय पाउने र पारिवारिक खुसी पनि प्राप्त हुने भएकाले यो निर्णय डाक्टरहरुका लागि राम्रो भएको डा.रिजालको भनाइ छ।
हप्ताको सातै दिन बिरामीको सेवामा खटिँदा आफ्नो परिवारलाई समय दिन नसक्नु, बिरामीलाई सेवा दिन पर्ने चिकित्सक स्वयं आफू पनि मानसिक तथा शारीरिक तनावमा रहनु पर्ने समस्या रहेकाले बिदा कार्यन्वयन गर्दा चिकित्सक तथा स्वास्थ्यकर्मीको मनोबल उच्च हुने विश्वास आफूहरूको रहेको रिजाल बताउनुहुन्छ।
तपाईँको अभिमत