सातामा २ दिन बिदा : सरकारी अस्पतालका ओपीडी बन्द हुँदैन

सरकारले जेठ १ गतेदेखि शनिबार र आइतबार २ दिन सार्वजनिक बिदा दिने निर्णय गरेको छ । अन्य सरकारी कार्यालयजस्तै अस्पतालहरू ओपीडी सेवा बन्द हुन्छ कि हुँदैन भन्ने चासो देखिएको छ ।

यसअघि पनि केही अस्पतालहरू आ-आफ्नो नियम बनाएर सार्वजनिक विदाकाे दिन ओपीडी खुलाइरहेका छन् । अहिले हप्तामा २ दिन बिदा दिने सरकारको निर्णय अस्पतालमा कार्यान्वयन गर्न नहुने आवाज उठ्न थालेको छ । स्वास्थ्य तथा जनसंख्या मन्त्रालय पनि लगातार २ दिन ओपिडी बन्द गर्न नहुने पक्षमा छ ।

स्वास्थ्य तथा जनसंख्या मन्त्री विरोध खतिवडाले अन्य सरकारी सेवा सातामा २ दिन बन्द भएपनि आइतबार अस्पतालका ओपीडी बन्द नगर्ने बताउनुभयो । ‘अस्पतालमा अन्य सेवा जस्तो हुँदैन । सातामा २ दिन कुनै हालतमा ओपीडी बन्द गर्न मिल्दैन’ यसबारे सर्कुलेशन गर्छाै मन्त्री खतिवडाले भन्नुभयो, ‘हामी व्यवस्थान गर्छौै ओपीडी खुल्छ।’

त्यसको व्यवस्थापनका लागि तयारी भइरहेको मन्त्री खतिवडाले जानकारी दिनुभयो ।लगातार २ दिन सार्वजनिक बिदा हुँदा बिरामीहरू मारमा पर्ने भएकाले यसको व्यवस्थापनमा लाग्नुपर्ने मन्त्रालयका नीति तथा योजना तथा अनुगमन महाशाखा प्रमुख डा.गुणराज लोहनी बताउनुहुन्छ।

‘मैले निर्णय हेरिसकेको छैन तर अस्पतालकाे काम अन्य सरकारी कार्यलयकाे जस्ताे नभएकाले लगातार २ दिन बिदा हुँदा बिरामी समस्यामा पर्छन्' डा. लोहनी भन्नुहुन्छ, बिदाको व्यवस्थापन मिलाउनुपर्छ । स्वास्थ्य संस्थामा लगातार २ दिन बिदा हुनुहुँदैन भन्ने पक्षमा हामी छौँ ।’