सहमति धोका हो, षड्यन्त्रको पोका हो : आन्दोलनरत चिकित्सक

काठमाडौं । नेपाल मेडिकल कलेज अत्तरखेल जोरपाटीका आवासीय चिकित्सकहरुले आफ्नो विभिन्न माग राखेर गरिएको आन्दोलन यथावत रहेको बताएकाछन् । आवासीय चिकित्सक डा. गुञ्जन खड्काले हेल्थपाटीसंग कुरा गर्दै बुधबार स्वास्थ्य मन्त्रालयमा गरिएको सम्झौता धोका भएको बताउनुभयो ।

उहाँले मन्त्रालयमा छलफलको लागि गएको भन्दै स्वास्थ्य मन्त्री बाहिरिनुभएकोले अन्य पदाधिकारीसंग छलफल गरिएको बताउनुभयो ।

यो पनि पढ्नुहोस : चिकित्सकमाथि कुटपिट गर्नेलाई ३ दिनभित्र कारबाही गरिने, सम्पूर्ण आन्दोलन स्थगित

छलफलकै क्रममा हामी निस्कीएर हिड्यौं,डा. खड्काले भन्नुभयो,पछि एकाएक सहमति भनेर प्रचार गरियो । उहाँले माग सम्बोधन नभई कुनै पनि हालतमा सम्झौता नहुने बताउनुभयो । उहाँले चिकित्सकलाई कुटपिट गर्ने व्यक्तिलाई तत्काल कानुनी दायरामा ल्याउनुपर्ने, सिसिटिभी फुटेज गाएब बनाउनेलाई कारबाही गर्नुपर्ने, चिकित्सकको सुरक्षाको प्रत्याभुती हुने ग्यारेन्टी गर्नुपर्ने लगायतका माग पुरा नभएसम्म आन्दोलन यथावत रहने जानकारी दिनुभयो ।

यसअघि  स्वास्थ्य तथा जनसंख्या मन्त्रालयले नेपाल मेडिकल कलेजका चिकित्सकमाथि दुर्व्यवहार र हातपात गर्नेलाई ३ दिनभित्र कारबाही गर्न गृह मन्त्रालयलाई अनुरोध गर्ने, घटना भएको अवधिको सिसिटिभि फुटेज गायब बनाउनेलाई पनि ३ दिनभित्र नै कारबाही गर्न मन्त्रालयले गृहलाइ अनुरोध गर्ने लगायतको सहमति भएको थियो ।

यो पनि: डाक्टरलाई लात्ती र मुक्का प्रहार गरेको सीसीटीभी फुटेज कस्ले लुकायो ? 

चिकित्सकहरुमाथि भएको दुर्व्यवहार र हातपात गर्नेलाई कारबाही गर्नुपर्ने माग राख्दै आन्दोलनमा उत्रिएका चिकित्सक,स्वास्थ्य तथा जनसंख्या मन्त्रालय,आवासीय चिकित्सक संघ,नेपाल मेडिकल काउन्सिलका प्रतिनिधिहरुको बैठकमा मन्त्रालयले ३ दिनभित्र कारबाहीको दायरामा ल्याउन पहल गर्ने निर्णय भएको थियो  ।