स्वास्थ्य उपकरणको बृहत प्रदर्शनी भृकुटीमण्डपमा, व्यवसायीले नीति सुधारको माग

काठमाडौँ, १७ वैशाख । काठमाडौँको भृकुटीमण्डपमा ‘नेपाल मेडिकल शो तथा ल्याब एक्स्पो २०२६’ बिहीबारदेखि सुरु भएको छ। मेडिकल उपकरण तथा प्रविधिजन्य स्वास्थ्य सामग्रीहरूको बृहत प्रदर्शनीका रूपमा रहेको यो एक्स्पो तीन दिनसम्म सञ्चालन हुनेछ।

एचडी प्रोमो मिडियाले केमिकल एण्ड मेडिकल सप्लायर्स एसोसिएशन अफ नेपाल (केमसान) सँगको सहकार्यमा आयोजना गरेको यो नवौँ संस्करण हो।

उद्घाटनका अवसरमा नेपाल उद्योग वाणिज्य महासंघका अध्यक्ष चन्द्रप्रसाद ढकालले यस्ता प्रदर्शनीहरूले निजी क्षेत्रलाई सक्रिय बनाउँदै समग्र अर्थतन्त्रमा सकारात्मक प्रभाव पार्ने बताउनुभयो। उहाँले निजी क्षेत्रका समस्याहरू समाधान गर्न महासंघ सहकार्य गर्न तयार रहेको भन्नुभयो।

कार्यक्रममा केमसानका अध्यक्ष भक्त हमालले एक्स्पो स्वास्थ्य क्षेत्रका सरोकारवालाका लागि उपयोगी हुने बताउनुभयो। 

उहाँले अस्पताल स्थापना गर्न वा सेवा विस्तार गर्न चाहनेहरूका लागि आवश्यक उपकरण, प्रविधि र लगानीबारे जानकारी लिन सकिने भन्नुभयो। हमालले अक्सिजन प्रणालीदेखि सीटी स्क्यान र एमआरआईजस्ता अत्याधुनिक उपकरणको तुलना गर्न सकिने उहाँले बताउनुभयो, जसले नयाँ प्रविधि भित्र्याउने निर्णय प्रक्रियालाई सहज बनाउन माग गर्नुभयो । 

स्वास्थ्य क्षेत्रमा देखिएका चुनौतीबारे चर्चा गर्दै उहाँले समयमै भुक्तानी नहुनु, स्वास्थ्य सामग्रीमा भ्याट लाग्नु र एमआरपी निर्धारणजस्ता विषयले व्यवसायीलाई समस्या परेको बताउनुभयो। उहाँले  उपकरणको गुणस्तर सुनिश्चित गर्न प्रभावकारी एक्रिडिटेशन प्रणाली आवश्यक रहेको भन्नुभयो।

उद्घाटन सत्रमा नेपाल चिकित्सक संघका अध्यक्ष अनिल विक्रम कार्की, निजी अस्पताल सञ्चालकहरूको संस्था अफिनका अध्यक्ष पदमबहादुर खड्का लगायतले एक्स्पो सफलताको शुभकामना दिनुभयो।

प्रदर्शनीमा नेपाल, भारतसहित विभिन्न देशका २०० भन्दा बढी स्टल सहभागी रहेका छन्। ८०० भन्दा बढी अन्तर्राष्ट्रिय ब्रान्ड र एक हजारभन्दा बढी उत्पादन तथा सेवाहरू एकै स्थानमा अवलोकन गर्न सकिने आयोजकले जनाएको छ।