प्रेमसागर फाउण्डेसन जनभोजन कार्यक्रम स्थलमा आँखा शिविर, १४३ जनामा मोतिविन्दु 

प्रेमसागर फाउण्डेसन नेपालद्वारा धादिङ जिल्लाको थाक्रे गापा ५, तसर्पु दामेचौरस्थित जनभोजन कार्यक्रम स्थलमा आयोजित दुई दिवसीय आँखा जाँच शिविरमा १४३ जनामा मोतिविन्दुको समस्या देखिएको छ । 

शिविर चैत १४ र १५ गते सञ्चालन गरिएको थियो । फाउण्डेसनका उपाध्यक्ष डा. प्रेमराज ढुङ्गेलका अनुसार शिविरमा १ हजार १०१ जना ६९७ जना महिला र ४०४ जना पुरुष को आँखा जाँच गरिएकोमा ४५५ जनालाई चस्मा र ४३८ जनालाई औषधी निस्शुल्क वितरण गरियो भने १४३ जनामा मोतिविन्दु रहेको पहिचान गरी शल्यक्रियाका लागि सिफारिस गरिएको छ । 

उहाँले थाक्रे गाउँपालिका र थाहा नगरपालिकाका ९ वडाका ६१ गाउँहरूबाट आएका सेवाग्राहीहरूमा ९२ वर्षसम्म उमेर भएका ३०१ जना जेष्ठ नागरिक र १८ महिनादेखि माथि उमेर भएका २५७ जना बालबालिकाहरू  रहेको जानकारी दिनुभयो । 

फाउण्डेसनका महासचिव दुर्गा दत्त घिमिरेले खराब मौसम हुँदाहुँदै त्यस भेगका मानिसहरूको ठूलो सहभागिताले त्यहाँ यस्ता स्वास्थ्य शिविर अत्यावश्यक छ भन्ने देखाएको र गाडीबाट २ घण्टामा नै देशको संघीय राजधानी पुग्न सकिने गाउँहरूमा ठूलै संख्यामा मोतिविन्दु भेटिनुले त्यहाँ आँखा स्वास्थ्यमा विशेष ध्यान दिनुपर्ने अवस्था रहेको बताउनुभयो । 

शिविरमा संलग्न वरिष्ठ नेत्र विशेषज्ञ डा. दिपक खड्काका अनुसार शिविरमा आएकामध्ये मोबाइल र ल्यापटप बढी हेर्ने गरेका कारण बालबालिकाहरुमा  रिफ्र्याक्सन, उमेर पुगेकाहरूलाई मोतिविन्दु , आँखा चिलाउने र मासु पलाउने समस्याहरू देखिएको छ । उहाँले ४० वर्ष कटेकाहरूमा सुक्खा आँखा र नजिकको नदेख्ने समस्या रहेको देखिएको बताउनुभयो । 

थाक्रे गाउँपालिका ८ का वडा सदस्य राज कुमार गुरूङले सुव्यवस्थित शिविर सञ्चालन गरेकामा धन्यवाद व्यक्त गर्नुभयो । 
दामेचौरमा १६ वर्षदेखि जनभोजन कार्यक्रम सञ्चालन भइरहेको छ ।