भारतसम्म आइपुग्यो नयाँ प्रजातिको कोरोना, नेपाल कति जोखिममा ?
भारतमा ६ जनामा संक्रमण
काठमाडौं । भारतमा पनि कोरोना भाइरसको नयाँ प्रजातिका बिरामी भेटिएका छन् । बेलायतबाट हालै फर्किएका ६ जनालाई नयाँ प्रकारको कोरोना संक्रमण भएको भारतीय स्वास्थ्य अधिकारीहरुले जानकारी दिएका छन् ।
६ जनालाई बेलायतमा देखिएको कोरोनाको नयाँ प्रकारको संक्रमण पुष्टि भएको छ । संक्रमण पुष्टि भएका ६ जनालाई आइसोलेसजनमा राखिएको छ ।
स्वास्थ्यमन्त्रीले निकाल्नुभएको विज्ञप्तिमा संक्रमण पुष्टि भएका व्यक्तिहरुको नजिकको सम्पर्क(क्लोज कन्ट्याक्ट)मा रहेकाहरुलाई क्वारेन्टिनमा राखिएको उल्लेख गरिएको छ ।
भारतमा १ करोड भन्दा बढीलाई संक्रमण पुष्टि भइसकेको छ भने डेढ लाख संक्रमितको मृत्यु भइसकेको छ । भारत विश्वमा कोरोनाबाट अतिप्रभावित देशमा दोस्रोमा पर्दछ । अमेरिका कोरोनाबाट अतिप्रभावित देशमा पहिलोमा पर्दछ ।
यसैबीच, नेपालमा हालै बेलायतबाट आएका ५ जनामा कोरोना पुष्टि भएको छ । यद्यपि उनीहरुमा नयाँ प्रजातिको कोरोना संक्रमण भए/नभएको पत्ता लगाउन उनीहरुको जिन सिक्वेन्सिङ अध्ययन गरिने भएको छ ।
बेलायत लगायतका देशबाट आई क्वारेन्टिनमा बसेका २८७ जनाको पीसीआर गर्ने स्वास्थ्य मन्त्रालयले जनाएको छ । भारतमा नयाँ प्रजातिको कोरोना भेटिएपछि नेपाल पनि संक्रमणको उच्च सम्भावनामा रहेको छ ।
हवाई र स्थल दुवै मार्गबाट भारत र नेपाल आउनेजाने क्रम चलिरहेकाले भाइरसको नयाँ प्रकारको संक्रमणको जोखिम रहेको छ । अहिलेसम्म बेलायत, दक्षिण अफ्रिका र नाइजेरियामा गरि कोरोना भाइरसको तीन फरक फरक प्रकार फेला परेको छ ।
दक्षिण अफ्रिका र नाइजेरियामा फेला परेको प्रजातिभन्दा बेलायतमा देखिएको प्रकार बढी संक्रामक रहेको प्रारम्भिक अध्ययनबाट देखिएको छ ।
अहिलेसम्म भारत, बेलायत, दक्षिण अफ्रिका, नाइजेरिया, फ्रान्स, जापान, नेदरल्याण्ड, स्वीडेन, सिंगापुर, अष्ट्रेलिया, स्पेन, क्यानाडा, इटाली र लेवनानमा नयाँ प्रकारको भाइरस भेटिएको पुष्टि भइसकेको छ ।
एकपछि अर्काे गर्दै कोरोनाको नयाँ भेरिएन्ट देखिन थालेपछि निर्माणाधिन खोपको प्रभावकारिता हुन्छ या हुँदैन एकीन भन्न सक्ने अवस्था छैन ।
तपाईँको अभिमत