सार्वजनिक बिदामा काम गर्ने कर्मचारीलाई सट्टा बिदा, स्वास्थ्य संस्थामा पनि लागू हुने

सार्वजनिक बिदाका दिनमा सेवा प्रदान गर्ने कर्मचारीले सट्टा बिदा पाउने भएका छन् । सट्टा बिदा स्वास्थ्यका कर्मचारीहरुलाई पनि लागू हुनेछ । 
सातामा दुई दिन बिदा दिने सम्बन्धमा गृह मन्त्रालयले  जारी गरेको  सूचना अनुसार गर्ने कर्मचारीले सट्टा बिदा पाउने भएका छन् ।सरकारले परीक्षणको रुपमा आउँदो जेठ १ गतेदेखि हप्तामा शनिबार र आइतबार दुई दिन सार्वजनिक बिदा दिने निर्णय लागू गर्दैछ ।

गृह मन्त्रालयले शनिबार र आइतबार सार्वजनिक बिदा दिने, सोमबारदेखि शुक्रबारसम्म कार्यालय समय बिहान ९:३० देखि अपरान्ह ५:३० बजेसम्म निर्धारण गरेको छ । यसैगरी, कात्तिक १६ गतेदेखि माघ १५ गतेसम्म कार्यालय समय बिहान ९:३० बजेदेखि अपरान्ह ४:३० बजेसम्म रहनेछ ।

२०७९ सालका लागि निर्धारण गरिएका दशैं र तिहारका सार्वजनिक बिदा बाहेक अन्य बिदा लगातार दुई दिनभन्दा बढी भएमा सार्वजनिक सेवा प्रवाह गर्ने विभिन्न सरकारी संस्था र स्थानीय तहले तेस्रो दिनदेखि गृह मन्त्रालयले समय निर्धारण गरे बमोजिम सेवा प्रवाहको व्यवस्था मिलाउनपर्नेछ ।  

सार्वजनिक सेवा प्रवाह गर्ने अस्पताल र स्वास्थ्य चौकी, रोपवे, टेलिफोन, प्रहरी, विद्युत, खानेपानी, अध्यागमन, वारुणयन्त्र, टक्सार, रेडियो नेपाल, नेपाल टेलिभिजन, मुद्रण विभाग, कन्सुलर सेवा, राहदानी सेवा, हुलाक, जिल्ला प्रशासन कार्यालय, इलाका प्रशासन कार्यालय, सीमा प्रशासन कार्यालय, बैंकिङ्ग सेवा, आन्तरिक राजश्व, भूमि सुधार तथा मालपोत कार्यालय, नापी कार्यालय, भन्सार कार्यालय र स्थानीय तहमा यो नियम लागू हुनेछ ।

स्वास्थ्यकर्मीहरुले भने आफूहरुलाई सट्टा बिदा मान्य नहुने बताइरहेका छन् । यसअघि दिने भनिएका सट्टा बिदा आफूहरुले नपाएकाले यसपटक उक्त निर्णय नमान्ने उनीहरुको भनाइ छ । 

यद्यपी बिरामी मारमा पर्ने भन्दै केही संस्थाहरुले आइतबार ओपिडि सेवा बन्द नर्ने जनाएका छन् । अहिले निर्वाचनको बेला लगातार दुई दिन बिदा भइसकेकाले कान्ति बाल अस्पतालमा आउदो आइतबार ओपिडि खुला रहने र त्यसपछिका आइतबार ओपिडि गर्ने कि नगर्ने भन्ने सम्बन्धमा थप निर्णय गरिने अस्पताल प्रशासनले जनाएको छ।