भोलिदेखि हुने पीजी प्रवेश परीक्षाको प्रश्नपत्र बाहिरिएको हो ?
चिकित्सा शिक्षा आयोगले भोलिबाट चिकित्सा शिक्षा स्नातकोत्तर तह अर्थात पोस्ट ग्राजुएट(पीजी)को प्रवेश परीक्षा लिँदैछ ।
भोलिबाट सुरु हुने प्रवेश परीक्षाको प्रश्न पत्र बाहिरिएको हल्ला सुनिएको छ । सामाजिक सञ्जाल र केही मिडियाबाट समेत प्रश्न पत्र बाहिरिएको हल्ला फैलिएपछि आयोगले आफ्नो धारणा सार्वजनिक गरेको छ ।
आयोगले आज विज्ञप्ति जारी गर्दै हल्लाका भरमा परीक्षा नरोकिने जानकारी दिएको छ । प्रश्नपत्र बाहिरिएको भन्ने हल्लाका विषयमा छानबिन अगाडि बढाइसकिएको जानकारी दिएको छ।
‘परीक्षाको गोपनीयता लगायतका विषयमा विभिन्न किसिमका भ्रम उत्पन्न हुने गरी सामाजिक सञ्जाल र केही सञ्चार माध्यममा अनर्गल प्रचार भएकोमा आयोगको गम्भीर ध्यानाकर्षण भएको छ’ विज्ञप्तिमा भनिएको छ, ‘यस विषयमा सम्बन्धित निकायहरुबाट छानबिनका लागि प्रक्रिया अगाडि बढाइसकिएको छ।’
आयोगले पीजीको प्रवेश परीक्षा माघ ८ देखि १० गतेसम्म सञ्चालन गर्दैछ ।
तपाईँको अभिमत