आकस्मिक कक्षमै डाक्टर कुटेका कासका कर्मचारी निलम्बित

कर्णाली स्वास्थ्य विज्ञान प्रतिष्ठानमा कार्यरत डाक्टरलाई कुट्ने प्रतिष्ठानकै प्रशासनतर्फका कर्मचारी धनबहादुर शाहीलाई निलम्बन गरिएको छ । प्रतिष्ठानका प्रवक्ता डा.रमेश भट्टराईले आज कार्यकारी परिषद्को बैठकले शाहीलाई निलम्बन गर्ने निर्णय गरेको जानकारी दिनुभयो । साथै घटनाबारे छानबिन गर्न कमिटी बनाइएको उहाँले बताउनुभयो । 

डाक्टर पिटेका शाही अहिले प्रहरी नियन्त्रणमा छन् । शाहीले अस्पतालको आकस्मिक विभागमा कार्यरत डा.करण साहलाई ड्युटीमै रहेका बेला कुटपिट गरेका थिए । प्रतिष्ठान, शिक्षण अस्पतालका स्वास्थ्यकर्मी तथा चिकित्सकहरूले डा.साहमाथि कुटपिट गर्ने शाहीलाई कारबाहीको माग गर्दै आन्दोलनका कार्यक्रम सार्वजनिक गरेका थिए । 

उनीहरूले दोषीलाई कारबाही नभए आईसीयू, इमरजेन्सी र एनआईसीयू बाहेकको सबै सेवा बन्द गर्ने चेतावनीसमेत दिएका थिए । घटनाको विरोधमा अस्पतालका डाक्टर,नर्स लगायत स्वास्थ्यकर्मीहरूले शुक्रबार र शनिबार दुई दिन कालोपट्टी बाधेर काम गरेका छन् ।

शाहीलाई निलम्बन गरेसँगै आन्दोलनका कार्यक्रमबारे के गर्ने भन्ने विषयमा छलफल भइरहेको एक डाक्टरले जानकारी दिनुभएको छ । 

छोराको टाका काट्न भन्दै शाही इमरजेन्सी विभागमा पुगेको थिए । उनले भन्नेबित्तिकै डाक्टरले छोरालाई नहेरेको भन्दै डा. साहलाई शाहीले कुटेकाे अर्का एक डाक्टरले जानकारी दिनुभयाे । शाही प्रतिष्ठानमा चाैथाे तहमा कार्यरत कर्मचारी हुन् । सीसीटीभी फुटेजमा शहीले डाक्टरलाई मुक्का हानेर  मुखमा लात्तीले हानेको देखिन्छ ।