एमाले छाड्ने डाक्टरबारे डा.जागेश्वरको प्रतिक्रिया : अध्यक्ष पद हत्याउने प्रयत्न थियो
हेल्थपाटी - आषाढ ३१, २०८० १६:०२ मा प्रकाशित
अ +
अ -
राष्ट्रिय चिकित्सक संघका महासचिव डा.पुष्पमणि खरालले पहिलेदेखि पद छाड्न खोजेको संघका अध्यक्ष प्रा.डा.जागेश्वर गौतमले बताउनुभएको छ । डा.खरालले पदबाट राजीनामा दिनु आकस्मिक नभएको गौतमको भनाइ छ ।
आज मात्रै विज्ञप्ति जारी गर्दै एमाले छाड्ने निर्णय गर्नुभएका डा.खराल मौकापरस्थ गतिविधिमा लागेको अध्यक्ष डा.गौतमको आरोप छ ।
'उहाँको बिगतलाइ हेर्दा पटक–पटक मौकापरस्त गतिविधि गरिरहनुभएको हामी सबैलाई जानकारी नै छ। कार्यकर्ताको मूल्यांकन छोटो समयमा हुन सक्दैन’ गौतमले भन्नुभयो।
गत अधिवेसनमा डा.खरालले जसरी पनि अध्यक्ष पद हत्याउन खाेजेको डा.गौतमले बताउनुभएको छ । खराल अध्यक्ष हुनु संघका लागि हानिकारक हुने भएकाले उहाँलाई रोक्नका लागि नै आफू अध्यक्ष बन्नु परेको भनाइ गौतमको छ।
‘गत अधिवेशनमा उहाँ अध्यक्षको पद जसरी पनि हत्याउने प्रयत्नमा रहेकोले उक्त कदम संघको निम्ति प्रत्युत्पादक हुने महसुस गरी सिनियर साथीहरूको आग्रहमा मैले धेरै इच्छा नराख्दा नराख्दै पनि अभिभावकीय भूमिकाको निम्ति अध्यक्ष पदमा उम्मेदवारी दिएको थिएँ’ गौतमले भन्नुभयो ।
एउटा संगठन छाडेर अर्काेमा जानु व्यक्तिको अधिकार भएको गौतमले बतताउनुभयो । त्यसरी संगठन बदल्ने निर्णय देशको हितमा हुनुपर्ने डा.गौतमको भनाइ छ ।
राष्ट्रिय चिकित्सक संघमा डा.खरालले गरेको कामका लागि डा.गौतमले धन्यवाद दिनुभएको छ ।
‘राजनैतिक यात्रा सफल रहोस भन्ने शुभकामना पनि व्यक्त गर्दछु। कालान्तरमा फेरि राजनैतिक भेट हुने नै छ’ गौतम भन्नुहुन्छ, समय बलवान छ।’
राष्ट्रिय चिकित्सक संघका आवद्धलाई गौतमले संयमित भएर काममा लाग्नन आग्रह गर्नुभएको छ ।
तपाईँको अभिमत