केपी ओलीलाई धन्यवाद दिँदै डाक्टरले छाड्नुभयो एमाले पार्टी

नेकपा एमालेनिकट डाक्टरका नेताले पार्टी बदल्ने निर्णय गर्नुभएको छ । एमाले निकट चिकित्सकको संगठन राष्ट्रिय चिकित्सक संघका महासचिव डा. पुष्पमणि खरालले पदबाट राजीनामा दिएको घोषण गर्नुभएको छ।

खरालले आज राजीनामाको निर्णय फेसबुकमार्फत सार्वजनिक गर्नुभएको छ । एमालेको नेतृत्वमा देशमा परिवर्तन सम्झव नभएकोले राजनीतिको नयाँ बाटोका लाग्न लागेको डा.खरालले बताउनुभएको छ । 

‘नेकपा एमाले अन्तरगर्तको राष्ट्रिय चिकित्सक संघको महासचिव भएर पनि काम गरेँ। पार्टीका अन्य अंगहरुमा प्रत्यक्ष र अप्रत्यक्ष रुपमा सकेजति योगदान पनि गरेँ’ डा.खरालले भन्नुभएको छ,  ‘वर्षौपछि आज फर्केर हेर्दा मैले यथास्थितिको अवस्थाबाट देश र जनतालाई सकारात्मक योगदान दिन नसक्ने निचोड निकालेँ । मैले अब उप्रान्त राजनीतिको नयाँ अध्याय कोर्ने फैसला गरेको छु।’

खरालले आजैबाट एमालेको कुनै पनि जिम्मेवारीमा नरहेको घोषणा समेत गर्नुभएको छ । पुरानो यात्रामा सहयोग गरेको एमाले अध्यक्ष केपी शर्मा ओली र पार्टीका पदाधिकारी साथै आफ्ना संगठनका सहकर्मीहरुलाई समेत धन्यवाद दिनुभएको छ । 

डा.खराले राजनीतिको नयाँ अध्याय भनेर अब कता लाग्ने भन्नेबारे खुलाउनुभएको छैन । एमालेनिकट एक डाक्टरले दिएको जानकारी अनुसार उहाँ रवि लामिछानेको नेतृत्वमा रहेको राष्ट्रिय स्वतन्त्र पार्टीमा जाने तयारीमा हुनुहुन्छ । 

अघिल्लो वर्ष असोजमा भएको राष्ट्रिय चिकित्सक संघको दोस्रो सम्मेलनबाट डा.खराल महासचिवमा चयन हुनुभएको थियो ।