सरकार : ५० प्रतिशत जोखिम भत्ता दिन्छाैं, स्वास्थ्यकर्मी : पहिलाको त पाएका छैनाैं
काठमाडौं । स्वास्थ्य तथा जनसंख्या मन्त्रालयले कोरोना भाइरस पहिचान, निदान र उपचारमा खटिएका स्वास्थ्यकर्मी तथा कर्मचारीलाई जोखिम भत्ता उपलब्ध गराउन सबै अस्पतालसँग विवरण माग गरेको छ ।
“गतसालको महामारीमा खटेकाे भत्ता त पाएको छैन, यसपालिको के आशा राख्नु।”
कोरोना पहिचान, निदान र उपचारमा प्रत्यक्ष रुपमा संलग्न भएका चिकित्सक, स्वास्थ्यकर्मी, एम्बुलेन्स चालक, शव व्यवस्थापनमा रुपमा संलग्न कर्मचारी, सफाइकर्मी र सुरक्षाकर्मीको विवरण व्यवस्थित गर्ने र प्रमाणित अभिलेखका आधारमा भत्ता उपलब्ध गराइने मन्त्रायले पठाएको पत्रमा उल्लेख छ।
वैशाख १९ गतेको मन्त्रिपरिषद् निर्णय अनुसार कोभिड उपचारमा प्रत्यक्ष रुपमा खटिएका चिकित्सक, स्वास्थ्यकर्मी र अन्य कर्मचारीहरुलाई ६ महिना तलब स्केलेको ५० प्रतिशत जोखिम भत्ता उपलब्ध गराउन मन्त्रालयले विवरण माग गरेको हो।
मन्त्रालयको पत्रबारे बोल्दै केहि चिकित्सक तथा स्वास्थ्यकर्मीहरुले आफ्नो दुखेसो पोखे‚ “गतसालको महामारीमा खटेकाे भत्ता त पाएको छैन, यसपालिको के आशा राख्नु।” पहिला गतसालको भत्ता भुक्तानी गर्नुपर्ने उनीहरुको तर्क छ ।
‘गतवर्ष सरकारले स्वास्थ्यकर्मीहरुलाई प्रोत्साहन गर्न भन्दै शतप्रतिशत जोखिमभत्तता दिने निर्णय गरेको थियो तर हामीले सरकारले दिने भनेको त्यही भत्ताका लागि लडाँइनै गर्नपर्यो । अझै कतिपय साथीहरुले भत्ता पाउनु भएको छैन ।
एक स्वास्थ्यकर्मीले भन्नुभयो, ‘सरकारले हामीलाई लोभ्याएर जिस्काएको जस्तो भान हुन्छ । हामी आफ्नो कर्तव्यलाई बिर्सदैनौं, भत्ता नदिएपनि हामी बिरामीको उपचारमा छौं।’ उहाँले थप्नुभयो ।
यद्यपि भत्ता दिने निर्णय सकारात्मक भएको र यसपाली समयमा नै स्वास्थ्यकर्मीलाई भत्ता उपलब्ध गराउन मन्त्रालयले ध्यान दिनुपर्ने उनीहरुकाे प्रतिक्रिया छ ।
तपाईँको अभिमत