काठमाडौं उपत्यकामा आउँदो १६ गतेदेखि निषेधाज्ञा
काठमाडौं । कोरोना संक्रमण तीव्र रूपमा बढेपछि काठमाडौं उपत्यकाका तीन जिल्लामा आउँदो १६ गते अर्थात बिहीबार राति १२ बजेदेखि एक हप्ता निषेधाज्ञा लागू गरिने भएको छ ।
आज बसेको काठमाडौं‚ ललितपुर र भक्तपुरका प्रमुख जिल्ला अधिकारीहरूको बैठकले महामारी रोकथामका लागि निषेधाज्ञा जारी गर्ने निर्णय गरेको हो । बैठकको निर्णय केहीबेरमा सार्वजनिक गर्ने तयारी भएको स्रोतले जानकारी दिएको छ ।
निर्णय अनुसार उपत्यकामा अब अत्यावश्यकबाहेकका सबै सेवा बन्द रहनेछन् । कोभिड व्यवस्थापन समन्वय केन्द्र सिसिएससीले ५०० भन्दा बढी सक्रिय संक्रमित रहेका जिल्लामा लकडाउन वा निषेधाज्ञा लागू गर्ने अधिकार जिल्ला कोभिड समन्वय केन्द्र डिसिसिएमसीलाई दिएको थियो । काठमाडौं,भक्तपुर, ललितपुरसहित ९ जिल्लामा ५ सय भन्दाबढी सक्रिय संक्रमित छन् ।
नेपालमा संक्रमितको संख्या ३ लाख नाघिसकेको छ । आइतबार मात्रै ३१ सय २२ जनालाई संक्रमण पुष्टि भएको थियो भने २८ जनाको मृत्यु भएको थियो । संक्रमितको मृत्यु भएको यो महामारी सुरु भएयताकै दोस्रो धेरै हो । यसअघि कार्तिक १९ गते ३० जनाको मृत्यु भएको थियो ।
तपाईँको अभिमत