वीर अस्पतालमा ‘कक्लिअर इम्प्लान्ट’ शल्यक्रिया नियमित गरिने, उपकरणमा सरकारको ५० प्रतिशत अनुदान
हेल्थपाटी - बैशाख ०५, २०८२ १०:५२ मा प्रकाशित
अ +
अ -
वीर अस्पतालमा अब कानको सुनाइ उपकरण जडान ‘कक्लिअर इम्प्लान्ट’ नियमित गरिने भएको छ । सरकारले उपकरणमा ५० प्रतिशत अनुदान दिने भएपछि अब नियमित गरिने भएको हो ।
अस्पतालका वरिष्ठ नाक, कान, घाँटी रोग विशेषज्ञ तथा कक्लिएर इम्प्लान्ट सर्जन डा. रविभूषण सुवालको टिमले दुई जना वयस्क व्यक्तिमा कक्लिअर इम्प्लान्ट गर्दै सेवा सुचारु गरिएको हो ।
यसअघि दुई जना व्यक्तिको पनि कक्लिअर इम्प्लान्ट गरिएको थियो । अस्पतालका वरिष्ठ नाक, कान, घाँटीरोग विशेषज्ञ प्रा.डा. दीपेन्द्र श्रेष्ठका अनुसार त्यतिखेर भारतबाट चिकित्सक बोलाएर उहाँहरूको सहयोगमा इम्प्लान्ट गरिएको थियो ।
यद्यपि त्यतिखेर सरकारले उपकरणमा अनुदान दिएको थिएन । अब भने सरकारले ५० प्रतिशत उपकरणमा अनुदान दिने भएको हो । ‘१२–१३ लाख उपकरणको पर्छ । त्यसमा सरकारले ५० प्रतिशत अनुदान दिने भएको छ’, प्रा. डा. श्रेष्ठले भन्नुभयो, ‘अब नियमित शल्यक्रिया हुन्छ ।’
कक्लियर इम्प्लान्ट के हो ?
कक्लियर इम्प्लान्ट मानव कानले जस्तै सुनाईको काम गर्ने एक आधुनिक यन्त्र हो, जसको प्रयोगबाट कान पटक्कै नसुन्ने व्यक्तिलाई सुन्न सक्ने बनाउन सकिन्छ। कक्लियर इम्प्लान्टको दुई वटा भाग हुन्छन्। एउटा भाग शल्यक्रिया गरेर कानको पछाडि छालाभित्र हड्डीमै जडान गरी तार युक्त ईलेक्ट्रोडलाई कानको भित्री भाग कक्लियामा राखिन्छ।
अर्को भागलाई स्पीच प्रोसेसर भनिन्छ, जुन छालाबाहिर रहन्छ र चुम्बकद्वारा भित्री भागसँग जोडिन्छ। बाहिर जडान गरिएको भागमा माइक्रोफोन हुन्छ जसबाटट वातावरणको आवाज स्पीच प्रोसेसर सम्म पुग्दछ।
स्पीच प्रोसेसरबाट विभिन्न ध्वनि शक्तिलाई विभाजित गरी भित्र जडान गरिएको इम्प्लान्टमा रेडियोफ्रिक्वेन्सी सिग्नलवाट पठाइन्छ। यसरी आएका ध्वनी शक्ति भित्र जडान गरिएको इम्प्लान्टबाट ईलेक्ट्रीकल शक्तिमा परिणत हुन्छ। जुन कक्लियामा राखिएको ईलेक्ट्रोडसम्म पुग्दछ।
कक्लियर इम्प्लान्ट किन महङ्गो ?
यसको उपकरण महङ्गो रहेको छ । संसारभर नै महङ्गो रहेको प्रा.डा. श्रेष्ठको भनाइ छ । स्वीजरल्याण्ड, अस्ट्रेलियालगायतका मुलुकमा उपकरण बन्ने गरेको छ । ‘नेपाल शल्यक्रिया सस्तोमध्ये एक मुलुक हो । तर यहाँ हामीले अहिले शल्यक्रियाको पैसा लिने गरेको छैन’, प्रा.डा. श्रेष्ठले भन्नुभयो ।
नेपालमा कक्लिअर इम्प्लान्ट गर्नुपर्ने बिरामी ठुलो सङ्ख्यामा हुनसक्ने अनुमान विज्ञहरूले गरेका छन् । नेपालमा यसको शल्यक्रिया नहुने तथा महङ्गो समेत हुने भएकाले कतिपय इम्प्लान्ट गर्नबाट वञ्चित रहेका छन् । कतिपय भने भारत र थाइल्याण्ड जाने गरेका छन् ।
तपाईँको अभिमत