संक्रमित बोक्ने एम्बुलेन्स (१०२) का स्वास्थ्यकर्मीले पाएनन् जोखिमभत्ता
हेल्थपाटी - पौष ०९, २०७७ २०:३३ मा प्रकाशित
अ +
अ -
काठमाडौं । कोरोना संक्रमितलाई अस्पताल पुर्याउन दिनरात खटिरहेका एम्बुलेन्समा (१०२) कार्यरत चालक तथा स्वास्थ्यकर्मीहरुले जोखिमभत्ता नपाएको गुनासो गरेका छन् । नेपाल एम्बुलेन्स सेवाका करिब ५७ कर्मचारीले भदौ महिना देखि जोखिमभत्ता नपाएको एक स्वास्थ्यकर्मीले गुनासो गर्नुभयो ।
स्वास्थ्य मन्त्रालयले कार्तिक सम्मको जोखिमभत्ता उपलव्ध गराइसकेको सूचना निकाली सबैलाई जोखिमभत्ता दिन सम्वन्धित निकायलाई निर्देशन दिएपनि आफुहरुले श्रावण पछि जोखिमभत्ता नपाएको एक पारामेडिक्सले दुखेसो पोख्नुभयो ।
‘दिनरात नभनी आफ्नाे जीवननै जाेखिममा राखि जुनसुकै स्थानमा पुगी संक्रमितलाई अस्पताल पुर्याउने लगाएतकाे सेवा गरिरहेका छौं, सरकारले पनि फ्रन्टलाइनरहरुलाई जोखिमभत्ता दिने भनेको छ तर हामीले ४ महिनादेखि जोखिमभत्ता पाएका छैनौ,’ ति स्वास्थ्यकर्मी दुखेसो गर्दै भन्नुभयो ।
नेपाल एम्बुलेन्स सेवाका प्रमुख कार्यकारी अधिकृत अमित जोशीले सम्पूर्ण कर्मचारीलाई जोखिमभत्ता उपलव्ध गराउन स्वास्थ्य मन्त्रालयमा आफुहरुले पहल गरिरहेको बताउनुभयो । उहाँले कोरोना महामारीमा अहोरात्र खटि एम्बुलेन्स सेवा प्रवाह गरिरहेका आफ्ना सबै कर्मचारीलाई भत्ता उपलव्ध गराउन लागि परेको तथा स्वास्थ्य मन्त्रालयमा पनि प्रक्रियामा रहेकाले चाँडै भत्ता उपलव्ध गराउने जानकारी दिनुभयाे।
जोशीाका अनुसार एम्बुलेन्स सेवामाा ५७ जना कर्मचारी रहेका छन् । एम्बुलेन्स सेवाले काठमाडौं उपत्यकामा ८ वटा तथा चितवन तथा पाेखरामा १ /१ वटा एम्बुलेन्स मार्फत संक्रमितलाई अस्पताल पुर्याउने लगायतका सेवा प्रदान गरिरहेको छ ।
१०२ मा फोन गरेमा काठमाडौं उपत्यकाको जुनसुकै स्थानमा पुगि एम्बुलेन्स सेवाले संक्रमितलाई निःशुल्क अस्पताल पुर्याउदै आएको छ । निःशुल्क सेवा प्रदान गरे बापत् एम्बुलेन्स सेवालाई काठमाडौं महानगरपालिकाले मासिक १२ लाख सहयाेग उपलब्ध गराउदै आएको छ ।
तपाईँको अभिमत