८५० बढी स्वास्थ्यकर्मी संक्रमित, सेवा प्रभावित भएको रिपोर्टिङ छैन

नेपालमा कोरोना महामारी सुरु भएसँगै हालसम्म १० हजार ३११ जना स्वास्थ्यकर्मी संक्रमित भएको र त्यसमध्ये ५० जनाको मृत्यु भएको सरकारी तथ्यांक छ । खोप लगाइनसकेको अवस्था तथा पर्याप्त मेडिकल सामग्री नहुँदा, पहिलो र दोस्रो लहरमा नेपालले ५० जना स्वास्थ्यकर्मी गुमाउन पर्‍यो । 

अहिले सरकारले घोषणा गरिनसकेको तर ओमीक्रोन भेरियन्ट फैलिएसँगै संक्रमणको उत्कर्षमा पुग्नै लागेको भनिरहँदा झण्डै ८५० जना स्वास्थ्यकर्मी संक्रमणमा परिसकेका छन् । छाेटाे अवधिमा ठूलो संख्यामा स्वास्थ्यकर्मीहरू संक्रमित हुँदा स्वास्थ्य सेवा प्रभावित हुने चिन्ता बढेको छ। 

पहिलो र दोस्रो लहरको तुलनामा यसपाली एकैपटक धेरै स्वास्थ्यकर्मीहरू संक्रमित भएको स्वास्थ्य तथा जनसंख्या मन्त्रालयले जनाएको छ । यद्यपी ठूलो संख्यामा स्वास्थ्यकर्मी संक्रमित भएपनि अस्पताल भर्ना हुने स्वास्थ्यकर्मी भने न्यून रहेको स्वास्थ्य अधिकारीले जानकारी दिनुभएको छ । 

मन्त्रालयका सहप्रवक्ता डा.समीरकुमार अधिकारीले यसपटकको संक्रमणमा देशभर डाक्टर, नर्स, पारामेडिक्स गरी स्वास्थ्यकर्मी संक्रमित भइरहेको र चुनौतीलाई भोगिरहेको उहाँको भनाइ छ । 

काठमाडौं उपत्यकामा मात्रै ५०६ जना स्वास्थ्यकर्मी संक्रमित भइसकेका छन् । यसरी ठूलो संख्यामा स्वास्थ्यकर्मी संक्रमित भइरहँदा स्वास्थ्य सेवा कति प्रभावित भएको होला ?  अहिलेसम्म सेवा नै प्रभावित भएको भन्ने रिपोर्टिङ मन्त्रालयमा नभएको सहप्रवक्ता अधिकारी बताउनुभयो । 
‘उपत्यकाका ठूला-ठूला अस्पतालका स्वास्थ्यकर्मीहरू संक्रमित हुनुभएको छ' उहाँले भन्नुभयो, ‘आलोपालो गरेर स्वास्थ्य सेवा दिइरहनुभएको छ, अब २/३ दिनमा समस्या कम हुँदै जाने अनुमान छ।’   स्वास्थ्यकर्मी धेरै संक्रमित भएपनि यसपटक अस्पताल भर्ना हुनेदर अत्यन्तै कम देखिएको अधिकारीले बताउनु भयो।

बिरामीहरुसँग निरन्तर सम्पर्कमा रहनुपर्ने भएकाले स्वास्थ्यकर्मी बढीमात्रामा संक्रमित भएको अधिकारीको भनाइ छ । दुवै मात्रा खोप लगाएको ६ महिना पूरा भइसकेको र भाइरसले पनि रुप फेरिरहेको अवस्थाले संक्रमण बढेको हुनसक्ने उहाँ बताउनु हुन्छ।

७ दिनको आइसोलेसनमा बसेर काममा फर्कन निर्देशन
विभिन्न अध्ययनले यसपटकको संक्रमण ७ दिनपछि नसर्ने देखाएको छ । ७ दिनपछि सर्ने नदेखिएकाले स्वास्थ्यकर्मीलाई ७ दिनको आइसोलेसन पश्चात जनस्वास्थ्यका मापदण्ड पालना गर्दै नियमित काममा फर्कन निर्देशन दिइएको जानकारी अधिकारीले दिनुभयो । 

स्वाथ्यकर्मी अभाव हुन नदिन पत्राचार 
संक्रमण बढ्दै जाँदा जनशक्तिको अभाव हुने देखिएपछि स्वास्थ्य मन्त्रालयले अस्पतालहरुलाई जनशक्ति व्यवस्थापन गर्न निर्देशन दिइसकेको छ । करारमा भर्ना भएका स्वास्थ्यकर्मीलाई माघ महिनादेखि बढीमा ३ महिनासम्म म्याद थपेर राख्न मन्त्रालयले भनेको छ । साथै स्वीकृत दरवन्दीअनुसार कुनै पद रिक्त भए तत्काल व्यवस्थापन गर्न शिक्षण अस्पताल, प्रतिष्ठान, अस्पताल र प्रयोगशालाहरुलाई आग्रह् गरिएको छ । 

स्वास्थ्यकर्मीलाई बुस्टर डोज 
माघ २ गतेदेखि नै स्वास्थ्यकर्मीसहित अग्रपंक्तिमा खटिएका व्यक्तिहरुलाई बुस्टर डोज खोप दिइएको छ । पूर्णखोप लगाएको ६ महिना पुगेकालाई बुस्टर डोज दिइएको हो । स्वास्थ्यकर्मी, स्वास्थ्य संस्थाका कर्मचारी, सबै सुरक्षाकर्मी, सरसफाइकर्मी, एम्बुलेन्स, शववाहन चालक, महिला स्वास्थ्य स्वयसेविक, त्रिभुवन विमानस्थलमा खटिएका कर्मचारी, सञ्चारकर्मी तथा सार्वजनिक यातायातका चालक एवं सहचालकलाई बुस्टर डोज दिइनेछ । 

पहिलो लहरमा ७६९० जना संक्रमित, १० जनाको मृत्यु
नेपालमा कोरोना महामारीको पहिलो लहरमा ७ हजार ६९० स्वास्थ्यकर्मी संक्रमित भए। जसमध्ये १० जनाको मृत्यु भयो । यसैगरी दोस्रो लहरमा १७७७ जना स्वास्थ्यकर्मी संक्रमित हुँदा ४० जनाको मृत्यु भयो ।