बढ्दो तापक्रमका कारण आत्महत्याका घटनामा वृद्धि : अध्ययन

बढ्दो तापक्रमसँगै आत्महत्याको घटनामा वृद्धि हुने वैज्ञानिकहरूले बताएका छन् । दुई वर्षअघि ल्यान्सेट जर्नलमा यसबारे अध्ययन प्रतिवेदन प्रकाशित भएको थियो ।

अध्ययनअनुसार जलवायु परिवर्तनको कारण बढ्दो तापक्रमले मानसिक स्वास्थ्यमा गम्भीर असर पार्ने मात्र होइन, आत्महत्याका घटनामा समेत उल्लेखनीय वृद्धि गराउने प्रमाण प्रस्तुत गरेको हो । विशेषगरी आत्महत्या तथा आत्महत्याको प्रयासजस्ता चरम मानसिक संकटसँग तापक्रमको प्रत्यक्ष सम्बन्ध देखिएको छ।

यो व्यवस्थित समीक्षामा समावेश १४४ वटा अध्ययनहरूमध्ये ८६ वटा अध्ययनहरूले स्पष्ट रूपमा यसबारे देखाएको बताइएको छ । 

– मासिक औसत तापक्रममा १ डिग्री सेल्सियसको वृद्धि हुँदा आत्महत्याको घटना १.५% ले बढेको पाइएको छ।

– दैनिक औसत तापक्रममा १ डिग्री सेल्सियसले आत्महत्याको दरमा १.७% को वृद्धि हुने देखिएको छ।

– थप रूपमा, मासिक औसत तापक्रममा १ डिग्री सेल्सियसले आत्महत्याको जोखिम अनुपात १.०१ रहेको पत्ता लागेको छ।

सामान्य तापक्रमभन्दा केही डिग्रीको बढोत्तरीले समेत जनस्वास्थ्यमा गहिरो असर पार्न सक्ने अध्ययनले देखाएको छ । गर्मी बढ्ने क्रममा मानसिक तनाव, अवसाद, निद्रा समस्या र सामाजिक अलगावको जोखिम उच्च हुने सम्भावना हुन्छ, जसले गर्दा आत्महत्या जस्ता गम्भीर नतिजा निम्तिन सक्छन्।

अध्ययनकर्ताहरूले जलवायु परिवर्तनको सन्दर्भमा यस विषयमा तत्काल ध्यान दिनुपर्ने आवश्यकतामा जोड दिएका छन्। स्वास्थ्य प्रणाली, मानसिक स्वास्थ्य सेवा, र सरकारी नीति निर्माणकर्ताहरूले तापक्रम वृद्धिको प्रभावलाई ध्यानमा राखी दीर्घकालीन अनुकूलन रणनीति तयार गर्नु जरुरी रहेको चेतावनी समेत दिइएको छ।