चीन र अमेरिकाबाट एक करोड डोज खोप ल्याउँछाैं : परराष्ट्रमन्त्री ज्ञवाली
हेल्थपाटी - जेष्ठ १४, २०७८ १४:५५ मा प्रकाशित
अ +
अ -
काठमाडौं । परराष्ट्रमन्त्री प्रदीप ज्ञवालीले चीन र अमेरिका केन्द्रित रहेर कोरोना विरुद्धको खोप खरिद प्रक्रिया अघि बढाएको जानकारी दिनुभएको छ । स्वास्थ्य पत्रकार मञ्चले खोपबारे आयोजना गरेको भर्चुअल अन्तरक्रिया कार्यक्रममा मन्त्री ज्ञवालीले यो वर्षको अन्त्यसम्म लक्षित समूहलाई खोप दिनका लागि खरिद प्रक्रिया अघि बढाइसकेको जानकारी दिनुभयो ।
उहाँले चीनको भेरोसिल, अमेरिकाको जोन्सन एण्ड जोन्सन खोप खरिदका लागि पत्राचार गरिसकेको बताउनुभयो । ज्ञवालीले अबको १० दिनभित्र नेपालमा ल्याउने ५० लाख डोज खोपको टुङ्गो लाग्ने बताउनुभयो । चीन र अमेरिकाबाट ५० /५० लाख डोज खोप ल्याउने तयारी भइरहेकाले यसको ब्रेक थ्रु हुने मन्त्री ज्ञवालीको भनाइ छ ।
यसैगरी कोभिशिल्डको उत्पादनकर्ता सेरमले यो वर्षको अन्त्यसम्म कुनै पनि देशलाई खोप निर्यात नगर्ने घोषणा गरे पनि आफूहरुले १७ लाख डोज कोभिशिल्ड उपलव्ध गराउन भारतसँग आग्रह गरिरहेको उहाँले बताउनुभयो ।
झण्डै १४ लाख व्यक्तिले कोभिशिल्डको दोस्रो मात्रा लगाउन बाँकी रहेको सन्दर्भमा आफूहरुले भारतसँग यस्तो आग्रह गरेको मन्त्री ज्ञवालीको भनाइ छ । उहाँले एष्ट्रेजेनेकाको खोप आयातका लागि जुन - जुन देशले यो खोप भण्डारण गरेका छन् ती देशहरुमा कूटनीतिक पहल भइरहेको बताउनुभयो ।
विश्वमा उत्पादन भएका ९५ प्रतिशत खोप १५ देशमा थुपारिएको र बाँकी ५ प्रतिशत खोपमात्रै १६० भन्दा बढी देशमा रहेकाले पनि समस्या भएको उहाँको भनाइ छ ।
यसैगरी कार्यक्रममा स्वास्थ्य सेवा विभागका परिवार कल्याण महाशाखाका निर्देशक डा. तारानाथ पोखरेलले सिरमले यस वर्ष कोभिशिल्ड निर्यात नगर्ने बताएपछि कोभ्यासले कोभिशिल्डको विकल्प खोज्न अनुरोध गरेअनुरुप अन्य खोपका लागि कूटनीतिक पहल भइरहेको बताउनुभयो । उहाँले सकेसम्म कोभिशिल्ड र त्यो नभए विकल्पमा एस्ट्रेजेनेकाको खोपबारे सोच बनाइरहेको बताउनुभयो ।
यस्तै ईपिडिमियोलोजी तथा रोग निण्न्त्रण महाशाखा प्रमुख एवं मन्त्रालयका प्रवक्ता डा.कृष्ण पौडेलले खोप छिटो ल्याउने अभियानमा पत्रकार र सरकार सँगसँगै हुनुपर्नेमा जोड दिनुभयो । कार्यक्रममा मञ्चका अध्यक्ष रामप्रसाद न्यौपानेले कोरोनाबाट जोगिन खोप महत्वपूर्ण रहेकाले यस सम्बन्धमा सरकार गम्भीर हुनपर्ने बताउनुभयो ।
कोभिशिल्डको दोस्रो मात्रा लगाउन झण्डै १४ लाख व्यक्ति पालो कुरेर बसिरहेका छन् । फागुन २३ गतेपछि कोभिशिल्ड लगाएका व्यक्तिहरुले अबको एक हप्ताभित्रै दोस्रो खोप लगाउनुपर्ने हुन्छ ।
कोभिशिल्ड ८ हप्तापछि १२ हप्ताभित्र लगाउनुपर्ने भए पनि पछिल्लो पटक १६ हप्तासम्म लगाउन मिल्ने भनेकाले सोही अनुसार तयारी भइरहेको स्वास्थ्य मन्त्रालयले जनाएको छ ।
तपाईँको अभिमत