एकैदिन २६ कोरोना संक्रमितको मृत्यु

काठमाडौं । पछिल्लो २४ घण्टामा नेपालमा थप ५ हजार ७४३ जनामा कोरोना भाइरसको संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित प्रेस ब्रिफिङमा प्रवक्ता प्रा.डा.जागेश्वर गौतमले २० हजार १ सय १८ जनाको पिसिआर परीक्षण गर्दा ५ हजार ७४३ जनालाई कोरोना संक्रमण पुष्टि भएको जानकारी दिनुभयो । 

यो सँगै संक्रमितको संख्या १ लाख ४४ हजार ८७२ पुगेको छ । जसमध्ये ९९ हजार ६०५ जना निको भएका छन् । सक्रिय संक्रमितको संख्या ४४ हजार ४७६ रहेको छ । संस्थागत आइसोलेसनमा १४ हजार ६७६ जना र होम आइसोलेसनमा २९ हजार ८०० संक्रमित रहेका छन् । 
यस्तै आज थपिएका संक्रमितमध्ये ३ हजार १०७ जना काठमाडौं उपत्यकाका छन् । काठमाडौंमा २ हजार ३९१, भक्तपुरमा १७३ र ललितपुरमा ५४३ जना नयाँ संक्रमित थपिए । 

यसैबीच २४ घण्टामा २ हजार ९९६ जना कोरोनामुक्त भएका छन् । यस्तै २४ घण्टामा थप २६ संक्रमितको मृत्यु भएको छ । नेपालमा कोरोना संक्रमणबाट मृत्यु हुनेको संख्या ७९१ पुगेको छ ।