सरकारले डा. गोविन्द केसीको माग पुरा गर्ने, अनशन स्थगित (कागजातसहित)
आयोगबाट सिट निर्धारण भएपछि प्रवेश परीक्षाको प्रकृया अगाडि बढाइने
फाइल तस्बिर ।
हेल्थपाटी - श्रावन २९, २०८० १९:२२ मा प्रकाशित
अ +
अ -
सरकारले डा.गोविन्द केसीको माग पुरा गर्ने बताएपछि डा.गोविन्द केसीले अनसन स्थगित गर्नुभएको छ ।
प्राविधिक शिक्षा तथा व्यवसायिक तालिम परिषद्(सिटिईभिटी)को सिट निर्धारण र विद्यार्थी भर्ना लगायतका विषयलाई लिएर अनशनको घोषणा गर्नुभएको डा.गोविन्द केसीलाई शिक्षा, विज्ञान तथा प्रविधि मन्त्रालयले केसीको मागका सम्बन्धमा कार्यान्वयनका लागि निश्चित समय आवश्यक पर्ने भन्दै अनशन स्थगित गर्न अनुरोध गरेको थियो ।
डा.केसीले सरकारले प्रतिवद्धताहरु कार्यान्वयनका लागि समय मागेकाले हाललाई अनशन स्थगित गरेको जानकारी दिनुभएको छ ।
परिषद्का अध्यक्ष एवं शिक्षा विज्ञान तथा प्रविधि मन्त्रीले चिकित्सा शिक्षा आयोगबाट सम्बन्धन दिन स्वीकृति प्राप्त गरेका शिक्षण संस्थाहरूको सिट संख्या निर्धारणका लागि अविलम्ब चिकित्सा शिक्षा आयोग समक्ष लेखि पठाइ सो बारे मन्त्रालयलाई जानकारी गराउन निर्देशन दिनुभएको छ ।
परिषद्बबाट साउन १९ गते प्रकाशित सूचना बमोजिम निर्धारित प्रवेश परीक्षा आयोगबाट सिट निर्धारण भए पश्चात मन्त्रालयमा जानकारी गराई विद्यार्थी र अभिभावकको हितलाई ध्यानमा राखी प्रवेश परीक्षाको प्रकृया अगाडि बढाउन पनि परिषद्का अध्यक्षले निर्देशन दिनुभएको छ ।
चिकित्सा शिक्षा आयोगबाट सम्बन्धन दिन स्वीकृत प्राप्त हुन बाँकी रहेका शिक्षण संस्थाको हकमा प्राविधिक शिक्षा तथा व्यावसायिक तालिम परिषद्बाट गठित सम्बन्धन सम्बन्धी कार्यटोलीको सिफारिस प्राप्त भए पश्चात प्राविधिक शिक्षा तथा व्यावसायिक तालिम परिषद्को बैठकमा पेश गरिने भएको छ ।
चिकित्सा शिक्षा आयोगको उपाध्यक्ष नियुक्ति सम्बन्धमा मन्त्रिपरिषद्को साउन १६ गतेको निर्णयानुसार राष्ट्रिय चिकित्सा शिक्षा ऐनको दफा २३ बमोजिम लोक सेवा आयोगका अध्यक्षको संयोजकत्वमा सिफारिस समिति गठन भइसकेको र सो सिफारिस समितिले चिकित्सा शिक्षा आयोगको उपाध्यक्ष नियुक्तिका लागि नाम सिफारिस गर्न दरखास्त आह्वान समेत गरिसकेको शिक्षा मन्त्रालयले जानकारी दिएको छ ।
डा. केसीको मागका सम्बन्धमा विगतमा भएका सहमति र अध्यावधिक प्रगति विवरण :
तपाईँको अभिमत