ट्रमा 'जिता बराल' घटना छानबिन गर्न ३ सदस्यीय समिति गठन
पेशाको मान र मर्यादा राख्न नर्सलाई अपिल
काठमाडौं । नेपाल नर्सिङ संघले राष्ट्रिय ट्रमा सेन्टरमा नर्सिङ परिषद्की सदस्यसमेत रहनुभएकी जिता बराल घटनाको छानबिन गर्ने भएको छ । संघले न्याम्सकी जानकी धामीको संयोजकत्वमा न्याम्सकै राजकुमारी ज्ञवाली र पाटन अस्पतालकी दिलकुमारी थापा सदस्य रहने गरि ३ सदस्यीय छानबिन समिति बनाएको छ ।
ट्रमा सेन्टरले नर्सिङ संघलाई आवश्यक कारबाहीका लागि पत्र लेख्दै सो घटनाको विषयमा आवश्यक कारबाही गरी अस्पताललाई समेत जानकारी गराउन’ अनुरोध गरेको थियो । संघले पत्रकार सम्मेलन गरी आजीवन सदस्यसमेत रहनुभएकी बरालको असामान्य र अमर्यादित गतिबिधिबारे छानबिन गरि दोषी ठहरीएमा कारबाही गरिने जानकारी दिएको हो ।
संघकी अध्यक्ष मनकुमारी राईले सम्पूर्ण नर्सलाई मर्यादित र अनुशासित भई बिरामीको सेवामा लाग्न आग्रह गर्दै आफ्नो पेशाको मान र मर्यादा राख्न सबै नर्सलाई सचेत गराउनुभयो । साथै उहाँले केही दिनदेखि विभिन्न माग राख्दै धर्नामा बसेका नर्सहरुले संघमा अवाञ्छित गतिविधि गरिरहेको प्रति ध्यानाकर्षण भएको जनाउँदै तत्काल सच्चिन आन्दोलनरत नर्सलाई आग्रह गर्नुभयो ।
“उहाँहरुले राख्नुभएको माग वर्षाैंदेखि संघले नै राख्दै आएको छ, संघले समस्या समाधानका लागि पहल गरिरहेको छ, तर नर्सिङ संघलाई नै घृणित गर्ने काम भइरहेको छ । संघका पदाधिकारीहरुलाई अपशव्द बोल्दै मानहानी भइरहेको छ, संघलाई विभिन्न धम्की दिइएको छ, त्यसैले सरकारसँग संघ सुरक्षाको माग पनि गर्दछ” उहाँले भन्नुभयो ।
उहाँले आन्दोलित नर्सहरुको अवाञ्छित गतिविधिले नर्सिङ संघको काम कारबाहीमा नै बाधा पुगिरहेको भन्दै संघ र नर्सिङ पेशालाई नै घृणित हुने काम बन्द गर्न आग्रह गर्नुभयो ।
पत्रकार सम्मेलनमा संघकी सल्लाहकार एवं पूर्व अध्यक्ष प्रमिला देवानले आचारसंहितालाई नबिर्सि आफ्नो पेशामा समर्पित हुन आग्रह गर्नुभयो । उहाँले कार्यक्षेत्रभन्दा बाहिर नर्सले सेतो कोट लगाउने होइन, यो नर्सको मर्यादामा पर्दैन भन्दै मर्यादा कायम राख्न नर्सलाई अपिल गर्नुभयो ।
संघले जहिले पनि नर्सको हक हितकै निम्ति लागिपरिहेकाले अग्रज नर्सहरुको संघर्षलाई सम्मान गर्न नर्सहरुलाई अनुरोध गर्नुभयो । ट्रमा सेन्टरमा परिषद्की सदस्यसमेत रहनुभएकी जिता बरालले तथानाम बोल्दै ड्युटीमा खटिएका डाक्टर र नर्सलाई थुक्दै दुर्व्यवहार गर्नुभएको भिडियो सार्वजनिक भएको थियो ।
तपाईँको अभिमत