यस्ता लक्षण देखिए हुनसक्छ घाँटीको ग्यास्ट्रिक, उपचार कसरी गर्ने ? (भिडियो)

ग्यास्ट्रिक रोग भन्नेवित्तिकै आम नेपालीको साझा रोगका रुपमा बुझ्ने गरिन्छ। ग्यास्ट्रिक पेटको रोग हो। नाक, कान घाँटीरोग विशेषज्ञ डा.योगेश न्यौपानेका अनुसार घाँटीको ग्यास्ट्रिक पनि हुनसक्छ। 

त्रिवि शिक्षण अस्पतालमा कार्यरत डा.न्यौपानै घाँटीको ग्यास्ट्रिकबारे यस्तो जानकारी दिनुभएको छ। 

छाती पोल्नु, अमिलो पानी आउनुलाई मात्रै हामी ग्यास्ट्रिक सम्झिरहेका हुन्छौँ। हामीले सुन्दै आएको पनि त्यही हो। तर घाँटीको ग्यास्ट्रिक पनि हुन्छ। 

जसमा बिरामीलाई घाँटीमा केही कुरा अड्किएजस्तो, कपालको रौँ रहेको जस्तो हुन्छ। खाना खाँदा, पानी खाँदा केही पनि हुँदैन तर त्यत्तिकै बस्दा थुक निल्दा, केही अड्किएजस्तो घाँटीमा कपालको गुजुल्टो अड्किएजस्तो अप्ठेरो हुन्छ। 

यी घाँटीको ग्यास्ट्रिकको लक्षण हुन्। कोही–कोही बिरामी त म ओछ्यानमा पल्टियो कि खोकी लाग्छ भनेर पनि आउनुहुन्छ। पेटको ग्यास्ट्रिक बढेर घाँटीमा पुगेर, श्वास नलीमा गएर त्यसले इरिटेसन गराएर खोकी लागेको हो। खोकीको कारण पनि ग्यास्ट्रिक हुनसक्छ कुनै बेला। 

दशैंमा चाहिने भन्दा बढी खाएर दशैंपछि यस्ता समस्या लिएर अस्पताल आउने बिरामी पनि भेटिन्छन्।
उपचार कसरी हुन्छ त ? 

पेटमा भएको ग्यास्ट्रिकको राम्रो नियन्त्रण नभएर, पुरानो खाकीहरू भएकालाई तथा कोही–कोहीमा घुर्ने समस्या भएका कारण पनि पेटको ग्यास्ट्रिक घाँटीसम्म पुग्नसक्छ। 

यसको उपचार पेटको ग्यास्ट्रिक भन्दा फरक छैन। तर रोगको लक्षण फरक हुने भएकाले बिरामीले मलाई घाँटीमा केही भयो कि, क्यान्सर भयो कि ट्यूमर भयो कि भनेर शंका गर्नुहुन्छ। 

यसको उपचार पेटको ग्यास्ट्रिकको जस्तै हो, भन्नुको मतलब चिल्लो, पीरो अलि बार्नुपर्‍यो, खाना खानेवित्तिकै ओछ्यानमा पल्छिनु भएन, अझ उत्तानो परेर सुत्नु भएन। बिहानको खाना खाएपछि होस् वा रातिको खाना खाएपछि। यदि कोही मान्छे बेलुका ९ बजे सुत्छ भने साँझ ६–७ बजे चाँहि खाना खाइसकोस्। खाना खानेवित्तिकै टिभी हेर्न हुन्छ, कुर्सीमा बस्न हुन्छ। हिँडडुल गर्न हुन्छ तर ओछ्यानमा पल्टिन हुँदैन। 

तौल धेरै छ भने घटाउनुपर्छ । दुब्लो मान्छेलाई भन्दा मोटो मान्छेलाई धेरै ग्यास्ट्रिक हुने सम्झवना हुन्छ। यो सँगै घाँटीको ग्यास्ट्रिकको सम्भावना पनि बढी हुन्छ। 

नियमित व्यायाम र आवश्यक परेको खण्डमा औषधि खाएमा घाँटीको ग्यास्ट्रिक राम्ररी नियन्त्रण हुन्छ। 

यस्तै खालका लक्षण जस्तो घाँटीमा केही अड्किएजस्तो हुने अन्य रोग हुँदा पनि देखिन सक्छ। यस्तो बेला ग्यास्ट्रिक भएको होला औषधि खाएर निको पार्छु भनेर पनि बस्नु हुँदैन। 

अन्य गम्भीर समस्या पनि हुनसक्छ। घाँटीको कुनै समस्या भयो भने केही अड्किएको जस्तो भयो भने जतिसक्यो छिटो विज्ञलाई देखाएर समस्या पहिचान गर्नुपर्छ।