दशैँमा गाउँघर आवतजावत नगर्न सरकारको आग्रह
हाम्रो आशिर्वाद भनेको हाम्रा अभिभावकहरु हुन्
लकडाउनअघि गाउँ फर्कने बसको खोजीमा नयाँ बसपार्क पुगेका सर्वसाधारण ।
हेल्थपाटी - आश्विन २१, २०७७ १३:२१ मा प्रकाशित
अ +
अ -
काठमाडौं । सरकारले काठमाडौंमा कोरोना संक्रमण बढिरहेकाले यस वर्षको दशैँमा गाउँघर आवतजावत नगर्न सर्वसाधारणलाई अनुरोध गरेको छ । मन्त्रिपरिषद् वैठकको निर्णयबारे जानकारी दिन आयोजित पत्रकार सम्मेलनका क्रममा सरकारका प्रवक्ता एवं परराष्ट्रमन्त्री प्रदीप ज्ञवालीले संक्रमणबाट जोगिन यस वर्ष जो जहाँ छौँ, त्यहीँ बसेर दशैँ मनाउन सबैलाई आग्रह गर्नुभयो ।
दशैँ मनाउन गाउँघर जाँदा कोरोना संक्रमण पनि सँगै ओहोरदोहोर गर्ने भएकाले आफ्ना अभिभावकहरु उच्च जोखिममा रहने हुँदा यसतर्फ सचेत रहनुपर्ने उहाँको भनाई छ ।
दशैमा परिवारिक जमघट गर्ने, पारिवारिक पुनर्मिलन गर्ने, आफूभन्दा ठूलाको हातबाट टिका लगाई आशिर्वाद लिने भए पनि यसवर्ष परिस्थिति सामान्य नरहेकाले जो जहाँ छौँ, सोही स्थानबाट आशिर्वाद लिन सबैलाई आग्रह गर्नुभयो । पहिला स्वस्थ होऔँ, दशैँ त अर्काे वर्ष पनि आइहाल्छ, उहाँले भन्नुभयो, 'आफ्नो आशिर्वादलाई जोगाऔँ, हाम्रो आशिर्वाद भनेको हाम्रा अभिभावकहरु हुन् ।'
तपाईँको अभिमत