नर्स तथा स्वास्थ्यकर्मीको तलव भुक्तानी नगरे अस्पताल नवीकरण नगर्ने

काठमाडौं । स्वास्थ्य तथा जनसंख्या मन्त्रालयले नर्स तथा स्वास्थ्यकर्मीको तलवभत्ता अस्पतालहरुले अनिवार्य वैँक मार्फत भुक्तानी गर्नुपर्ने व्यवस्था मिलाएको छ । 

नेपाल नर्सिङ संघले नर्सहरुलाई न्यून तलव दिई शोषण गरेको भन्दै समस्या समाधानका लागि पहल गर्न अनुरोध गरेपछि स्वास्थ्य मन्त्रालयले तलवभत्ता वैंक मार्फत भुक्तानी गराउन सम्बन्धित निकायलाई निर्देशन दिन गुणस्तर मापन नियमन महाशाखा, समन्वय महाशाखा, स्वास्थ्य सेवा विभाग र अनुगमन तथा मूल्यांकन शाखालाई पत्र काटेको छ । 

मन्त्रालयले आफू मातहतका ४ विभागलाई निजी, सामुदायिक अस्पताल तथा मेडिकल कलेज र अन्य स्वास्थ्य संस्थाहरुले त्यस अस्पतालमा कार्यरत नर्सिङ तथा अन्य स्वास्थ्यकर्मीको तलवभत्ता बैक मार्फत भुक्तानी गरेको विवरण प्राप्त भएपछि मात्र स्वास्थ्य संस्था स्थापना, सञ्चालन तथा स्तरोन्नति मापदण्ड सम्बन्धी निर्देशिका, २०७० अनुसार अस्पताल सञ्चालन स्वीकृति तथा नवीकरण गर्ने व्यवस्था गर्न निर्देशन दिएको हो । 

यस्तै, निजी, सामुदायिक अस्पताल तथा मेडिकल कलेज र अन्य स्वास्थ्य संस्थाहरुले स्वास्थ्य उपकरणको आयात अनुमती, भन्सार छुट लगायतका सुविधाको सिफारिस गर्नुअघि अनिवार्य रुपमा त्यस अस्पताल र स्वास्थ्य संस्थामा कार्यरत स्वास्थ्यकर्मी तथा अन्य जनशक्तिको तलवभत्ता बैकिंङ प्रणाली मार्फत भुक्तानी गरेको कागजात प्राप्त भएपछि मात्र गर्न दिइने भएको छ । 

निजी तथा गैरसरकारी स्वास्थ्य संस्थाहरुमा कार्यरत नर्सहरुलाई न्यून तलव दिई शोषण गरेको, समयमा तलव नदिएको भनि लिखित तथा मौखिक निवेदन मार्फत जानकारी आएको भन्दै समस्या समाधान गरिदिन संघले मन्त्रालयलाई अनुरोध गरेको थियो ।