पूर्वप्रधानमन्त्री झलनाथ खनाललाई मिर्गौला  दिने व्यक्ति को हो ?

मिर्गौला प्रत्यारोपण गर्नुभएका पूर्वप्रधानमन्त्री झलनाथ खनालको स्वास्थ्य अवस्था सामान्य बन्दै गएपछि आज डिस्चार्ज हुँदै हुनुहुन्छ । भारतको दिल्लीस्थित इन्द्रप्रस्थ एपोलो अस्पतालमा गत २० साउनमा मिर्गौला प्रत्यारोपण गर्नुभएको थियो तर उहाँलाई मिर्गौला कसले दियो भन्ने कुरा बाहिर आएको थिएन । 

उहाँलाई श्रीमतीकी दिदीकी छोरी मेरिना चित्रकारले मिर्गौला दिएको खुल्न आएको छ । कान्तिपुर दैनिकका लागि दिल्ली व्यूरो प्रमुख राजेश मिश्रले लिएको अन्तर्वार्तामा पूर्वप्रधानमन्त्री खनालले आफूलाई मेरिना चित्राकारले मिर्गौला दान गरेको बताउनुभएको छ ।  उहाँले भन्नुभएको छ, ‘मेरिना मेरी श्रीमतीको दिदीको छोरी हुन् ।’

अन्तवार्ताका क्रममा खनालले आफूले पछिल्लो पटक काठमाडौँबाट दिल्लीका लागि उड्दा फर्किएर आउदिन कि भन्ने लागेकोसमेत अनुभव सुनाउनुभएको छ ।  ‘म अब फरकिन्न जस्तो लागेको थियो तर सुधार भयो, त्यसैले यो त मेरो नाफाको जिन्दगी भयो,’  उहाँले भन्नुभएको छ ।

सरकारले आफ्नो उपचार खर्च व्होर्ने निर्णय गरेकै कारण आफू बाँचेको समेत दाबी गर्नुभएको छ । ‘झलनाथले आफै खर्च व्यहोर्नुपर्छ भन्नु त झलनाथ अब मर्नुपर्छ भने जस्तै हो,’ उहाँले अगाडी थप्नुभएको छ, मेरो न जागिर छ, न कुनै आम्दानी भएको जग्गाजमिन अधिकांश सरकारलाई दिइसकेँ । म यहाँ दुई तीन दिन ढिला आएको भएपनि स्वास्थ्य तलमाथि हुनेरहेछ । 

सरकारले यता नल्याएको भए म पशुपति आर्यघाटमा पुगिसकेको हुन्थें । अहिले मेरो उपचार खर्चका विषयमा जसले आलोचना गरेको छ त्यो गैरजिम्मेवारी र हावादारी कुरा हुन्,’ उहाँले टिप्पणी गर्नुभएको छ । केपी ओली नेतृत्वको तत्कालिन सरकारले खनालको सम्पूर्ण उपचार खर्च व्यहोर्ने निर्णय गरेको थियो । सो निर्णयलाई शेरबहादुर देउवा नेतृत्वको बर्तमान सरकारले पनि सदर गरेको छ ।