वीर अस्पतालले इमर्जेन्सी शैय्या दोब्बर पार्ने, दुवाकोटमा प्रसूती र बालरोग सेवा सुरु गर्ने

नेपालको पुरानो वीर अस्पतालले आफ्नो १३६औं वार्षिकोत्सवमा इमर्जेन्सी सेवा विस्तार गर्ने घोषणा गरेको छ। अस्पतालले हाल ३५ शैय्याको इमर्जेन्सी क्षमतालाई ७० शैय्यामा पु¥याउने तयारी गरेको हो।

यसैगरी, भक्तपुरको दुवाकोटमा नयाँ स्वास्थ्य परियोजना अन्तर्गत प्रसूती र बालरोग सेवा सुरु गर्न लागिएको अस्पतालका निर्देशक प्रा.डा. दिलिप शर्माले बताउनुभयो।

निर्देशक प्रा.डा. शर्माका अनुसार, पछिल्लो एक वर्षमा वीरले साढे ६ लाख बिरामीलाई बहिरंग सेवा दिएको छ। विपन्न र दुर्गम क्षेत्रका बिरामीहरूलाई ६ करोड ४५ लाख रुपैयाँ बराबर निःशुल्क उपचार उपलब्ध गराइएको छ। यसै अवधिमा अस्पतालले ८ हजारभन्दा बढी एमआरआई, १६ हजार सिटीस्क्यान, ६१ हजार अल्ट्रासाउन्ड र २६ मिर्गौला प्रत्यारोपण गरेको छ।

सेवा विस्तारका लागि अस्पतालले बर्न सेन्टर, पेन क्लिनिक, कोक्लीयर इम्प्लान्ट, न्यूरोलोजीका अत्याधुनिक उपचार र सर्भाइकल क्यान्सर स्क्रीनिङ सेवा सुरु गरेको छ। आईसीयु र एचडियु सेवा विस्तार गरी ११० शैय्या थपिएको छ।